सफा टेम्पोमा नयाँ प्रविधिको ब्याट्री प्रयोग गरिने, परीक्षणका लागि तयार

काठमाडौं – नेपाल इलेक्ट्रिक भेइकल इन्डष्ट्रि रिसर्च एन्ड इनोभेसन प्रालि (नेभी) ले सञ्चालन गरिरहेको सफा टेम्पोमा अब नयाँ प्रविधिका ब्याट्री प्रयोग हुने भएका छन् । हाल प्रयोगमा रहेका ब्याट्रीको सट्टा आगामी दिनमा कुलिङ प्रणाली प्रयोग भएको नयाँ लिथियम आयोन ब्याट्री प्रयोग हुने छन् र यसको चार्जिङ समय छोटो हुनुका साथै लामो समय सम्म टिकाउ हुनेछन् ।

हाल यसको प्रोटोटाइप सार्वजनिक गरिएको छ र यसको परीक्षण कार्य गरिने छ । करिव तीन महिनाको परीक्षण पश्चात यी ब्याट्रीलाई व्यावहारिक रुपमा दोस्रो चरणको परीक्षणको लागि केही सफा टेम्पोमा प्रयोग गरिने नेभीका महाप्रबन्धक धर्म कुमार श्रेष्ठले बताए ।

नेपाल इलेक्ट्रिक भेइकल इन्डष्ट्रि रिसर्च एन्ड इनोभेसन प्रालि (नेभी) ले बेलायती सरकारसँग सहकार्यात्मक साझेदारीमार्फत बेलायती कम्पनी पीएके इन्जिनियरिङको प्राविधिक अनुसन्धानमा ‘प्रोजेक्ट गणेशा’ नामक नवीन परियोजना संचालन गरिरहेको र त्यसै परियोजना अन्तर्गतको यो एउटा उपलब्धि हो । यस परियोजना अन्तर्गत सफा टेम्पोलाई समयानुकूल आधुनिक बनाउने, नयाँ आधुनिक किसिमका ब्याट्री उत्पादन तथा एसेम्बली प्रविधि सम्बन्धी अध्ययन तथा परीक्षण कार्य भइरहेको छ ।

प्रोजेक्ट गणेशा अन्तर्गत इलेक्ट्रिक ट्रान्सपोर्ट र होम इनर्जीका लागि नयाँ मोडलका ब्याट्री लगायतका प्राविधिक सामग्रीको विकास भइरहेको छ । हाल धादिङ र बर्दिया गरी दुई स्थानलाई पाइलट फिल्डको रुपमा छनोट गरेर कार्य भइरहेको छ ।

नेभीले नेपालमा २०५२ साल देखि सफा टेम्पोको उत्पादन तथा सञ्चालन गर्दै आइरहेको छ । हाल यस अन्तर्गत ७ सय भन्दा बढी सफा टेम्पो सञ्चालनमा रहेका छन् । नेपालको विद्युतीय यातायात क्षेत्रमा यस कम्पनीले पु¥याएको योगदान तथा वातावरणलाई प्रदूषणमुक्त बनाउन महत्वपूर्ण भूमिका निर्वाह गरिरहेको छ ।