हुन्डाई टक्सनमा काठमाडौं–कन्याकुमारी सफरका लागि हिँडे तीनजना अटो ‘इन्थुजियास्ट’

काठमाडौं– हुन्डाई गाडिको नेपालका लागि आधिकारिक वितरक लक्ष्मी इन्टरकन्टिनेन्टल प्रालिले काठमाडौंदेखि कन्याकुमारीसम्म र फर्केर आउने एउटा उल्लेखनीय सडक यात्रामा निस्केका तीन जना नेपाली यात्रीहरूको यात्राबारे जानकारी गराएको छ । यस टोलीमा अटो इन्थुजियास्ट आवासिस ओझा, बैंकर विजय कसाजू र हाल अमेरिकामा बसोबास गर्दै आएका नीरज पोखरेल रहेका छन् ।

यो १३ दिने यात्रा मंसिर १७ देखि मंसिर २९ सम्म चल्नेछ । यस अवधिमा करिब ८ हजार किलोमिटर दूरी पार गरिनेछ, जसमा दैनिक ८ देखि १९ घण्टासम्मको लामो यात्रा समावेश छ ।

यात्रामा विजय कसाजूको हुन्डाई टक्सन प्रयोग गरिनेछ जनाइएको छ, जुन लामो दूरीको यात्रा क्षमता र आरामका लागि प्रसिद्ध एक प्रिमियम एसयूभी मानिन्छ ।

हुन्डाई टक्सन आफ्नो अल–व्हील ड्राइभ क्षमता, उच्च ग्राउन्ड क्लियरेन्स र बलियो बनावटका कारण मिश्रित सडक अवस्थाहरूमा लामो भू–भागको यात्राका लागि उपयुक्त मानिन्छ । टक्सनको भित्री भागमा फराकिलो क्याबिन र लामो समय सडकमा रहँदा यात्रुहरूलाई आराम दिनका लागि भेन्टिलेटेड सिटहरू उपलब्ध छन् ।

यसका अतिरिक्त, आवश्यक परे आरामका लागि यात्रीहरूले पछाडिको सिटमा क्याराभान शैलीको विश्रामको व्यवस्था पनि बनाएका छन् । यस स्तरका सडक यात्राहरूले नेपाली यात्रुहरू बीचको साहसिक भावनालाई उजागर गर्नुका साथै सीमापार पर्यटन, सांस्कृतिक आदानप्रदान र सडक गतिशीलता चेतनालाई प्रवद्र्धन गर्न मद्दत गर्ने विश्वास लिइएको छ ।