क्लासिक लेजेन्ड्सका सह–संस्थापकले जिते येज्दी ट्रेडमार्कको मुद्दा

क्लासिक लेजेन्ड्सका सह–संस्थापक बोमन इरानीले अन्ततः येज्दी ट्रेडमार्कको मुद्दा जितेका छन् । कर्नाटक उच्च अदालतले येज्दी ट्रेडमार्क मुद्दामा यसअघिको आदेशलाई उल्टाउँदै इरानी नै सही मालिक भएको फैसला सुनाएको हो ।

इरानीको ट्रेडमार्क दर्ताले ट्रेडमार्क ऐन, १९९९ को प्रावधानहरूको पालना गरेको अदालतले जनाएको छ । मूल इजाजतपत्र धारक आइडियल जावा (इन्डिया) लिमिटेडले येज्दी नाम नवीकरण, संरक्षण वा व्यावसायिक रूपमा प्रयोग गर्ने कुनै प्रयास नगरी १५ वर्षभन्दा बढी समयसम्म आफ्नो ट्रेडमार्क दर्ता समाप्त हुन दिएको उल्लेख गरिएको छ । अदालतले यसलाई ‘स्पष्ट कानुनी परित्याग’ भनेको छ ।

अदालतले कम्पनी वा आधिकारिक लिक्विडेटरले फाइलिङ वा बजार उपस्थिति कायम राख्न कुनै प्रयास नगरेको उल्लेख गरेको छ । बेन्चले सक्रिय प्रयोग र समयमै वैधानिक फाइलिङ मार्फत मात्र ट्रेडमार्क अधिकारहरू अवस्थित रहेको बताएको छ ।

यो फैसलाले येज्दी ट्रेडमार्कमाथिको कानुनी लडाईको अन्त्य गरेको छ, जसले क्लासिक लेजेन्ड्सलाई महिन्द्रा समूह अन्तर्गत येज्दी मोटरसाइकलहरू बिक्री गर्न बाटो खोलिदिएको छ ।