हिरोले ल्यायो सेगमेन्टमै सबैभन्दा बढी सुविधा भएको एक्स्ट्रिम १६०आर ४भी कम्ब्याट एडिसन बाइक

हिरो मोटोकर्पले भारतमा नयाँ २०२६ हिरो एक्स्ट्रिम १६०आर ४भी कम्ब्याट एडिसन आधिकारिक रूपमा लन्च गरेको छ। यो अपडेटसँगै एक्स्ट्रिम १६०आर ४भी १६० सीसी सेगमेन्टमा सबैभन्दा धेरै सुविधा भएको मोटरसाइकल बनेको छ।

कम्पनीले यसमा क्रुज कन्ट्रोल, राइड–बाइ–वायर थ्रोटल, तीनवटा राइड मोड र पूर्ण रंगीन डिजिटल डिस्प्लेसहितका धेरै नयाँ सुविधा थपेको छ। नयाँ मोडलको एक्स–शोरूम मूल्य १ लाख ३४ हजार १०० रुपैयाँ तोकिएको छ।

नयाँ एक्स्ट्रिम १६०आर ४भीमा हिरोको ठूलो बाइक एक्स्ट्रिम २५०आर बाट प्रेरित एलईडी हेडल्याम्प दिइएको छ, जसले अगाडिको भागलाई निकै आक्रामक र स्पोर्टी बनाएको छ । साथै फ्रन्टमा गोल्डन यूएसडी फोर्क, रियरमा रेड मोनोशर्क, फ्युल ट्याङ्कमा नयाँ ग्राफिक्स, साइड ट्याङ्कले यसको प्रिमियम लुक्सलाई अझ आकर्षक बनाएको छ ।

सो बाइकमा रेन, रोड र स्पोर्ट गरी तीनवटा राइड मोड दिइएको छ । साथै यसमा पहिलो पटक राइड बाइ वायर इलेक्ट्रोनिक थ्रोटल, क्रुज कन्ट्रोल, एलसीडी इन्स्ट्रयुमेन्ट क्लस्टरमा ब्लुटुथ कनेक्टिभिटी र टर्न–बाइ–टर्न नेभिगेसन जस्ता फिचर दिइएको छ । क्रुज कन्ट्रोल चलाउन यसमा छुट्टै स्विचगियर पनि थपिएको छ।

यसको इन्जिनमा भने कुनै परिवर्तन गरिएको छैन । यसमा १६३.२ सीसी सिंगल सिलिन्डर एयर कुल्ड इन्जिनले १६.९ बीएचपी पावर र १४.६ एनएम टर्क उत्पादन गर्छ। सो इन्जिन ५ स्पिड गियरबक्ससँग जोडिएको छ।