भारतमा यी ब्रान्डले ल्याउँदै आधा दर्जन नयाँ इलेक्ट्रिक स्कुटर

भारतमा हाल इलेक्ट्रिक सवारी साधनप्रतिको रुचि तीव्र रूपमा बढ्दै गएको छ । विशेषगरी इलेक्ट्रिक स्कुटरको माग पछिल्ला महिनाहरूमा उल्लेखनीय रूपमा वृद्धि भएको देखिन्छ । यस्तो अवस्थामा नयाँ ब्रान्डहरूले पनि आफ्ना उत्पादनहरू लन्च गर्ने तयारी गरिरहेका छन् । सुजुकी, यामाहा, एथर, सिम्पल इनर्जी र बजाज अटोले चाँडै आफ्ना नयाँ इलेक्ट्रिक स्कुटर बजारमा ल्याउने तयारी गरिरहेका छन् ।

सुजुकी मोटरसाइकल इन्डियाले यस वर्ष इन्डिया मोबिलिटी ग्लोबल एक्स्पो २०२५ मा आफ्नो पहिलो इलेक्ट्रिक स्कुटर ई–एक्सेस सार्वजनिक गरेको थियो । ३.०७ किलोवाट आवरको एलएफपी ब्याट्रीयुक्त सो मोडलले एक पटकको चार्जमा ९५ किलोमिटरसम्म रेन्ज दिन्छ । यसमा ४.१ किलोवाट मोटर जडान गरिएको छ, जसको टप स्पिड ७१ किलोमिटर प्रतिघन्टा रहेको छ । सो स्कुटर १ लाख भारु मूल्यमा लन्च हुन सक्ने अनुमान छ ।

यामाहाले पनि आफ्नो लोकप्रिय म्याक्सी स्कुटर एरोक्सको इलेक्ट्रिक संस्करण एरोक्स ई सार्वजनिक गरिसकेको छ, जसको मूल्य आगामी वर्षको सुरुवातमा खुलाइनेछ । यसमा ३ किलोवाट आवर ब्याट्री जडान गरिएको छ, जसले १०६ किलोमिटरसम्मको रेन्ज प्रदान गर्छ । साथै यसमा जडान गरिएको ९.४ किलोवाट मोटरले ४८ एनएमको टर्क उत्पादन गर्छ ।

बजाज अटोले आफ्नो लोकप्रिय इलेक्ट्रिक स्कुटर बजाज चेतकको नयाँ पुस्ता बजारमा ल्याउने तयारी गरिरहेको छ। नयाँ चेतकको परीक्षण भइसकेको छ र यसमा ३.५ किलोवाट आवर ब्याट्री हुने अपेक्षा गरिएको छ । यसले सिंगल चार्जमा १५० किलोमिटरसम्मको रेन्ज प्रदान गर्छ ।

यामाहाले भारतीय बजारका लागि ईसी०६ मोडल पेश गरेको छ, जुन डिजाइनका हिसाबले रिभर मोबिलिटीको रिभर इन्डीसँग मिल्दोजुल्दो छ । ४ किलोवाटको फिक्स्ड ब्याट्रीयुक्त सो स्कुटरले १६० किलोमिटरको रेन्ज प्रदान गर्छ र ६.७ किलोवाट पावर उत्पादन गर्छ।

सिम्पल इनर्जीले पनि अर्को वर्ष नयाँ इलेक्ट्रिक स्कुटर लन्च गर्ने तयारी गरिरहेको छ। यसमा करिब २०० किलोमिटरसम्म रेन्ज दिने ब्याट्री प्याक जडान गर्ने सम्भावना छ ।  साथै कम्पनीले निकट भविष्यमा एथर ईएल प्लेटफर्ममा आधारित अर्को मोडल ल्याउने तयारी समेत गरिरहेको छ ।