सेमी सोलिड स्टेट ब्याट्रीमा आयो नयाँ एमजी४, मूल्य १० हजार डलरभन्दा कम

एमजीले आफ्नो लोकप्रिय विद्युतीय ह्याचब्याक कार एमजी४ को नयाँ भर्सन लन्च गरेको छ । चीनमा जारी चेङ्दु अटो शो २०२५ मा कम्पनीले अल न्यू एमजी४ आधिकारिक रूपमा लन्च गरेको हो ।

५ वटा ट्रिममा उपलब्ध हुने यस नयाँ कारको सुरुवाती मूल्य ९ हजार ५६० डलर निर्धारण गरिएको छ । जवकी सेमी सोलिड स्टेट ब्याट्री जडित ट्रिमलाई १४ हजार २९० अमेरिकी डलर पर्ने जनाइएको छ ।

एसएआईसीको ई३ आर्किटेक्चरमा निर्मित एमजी४ मा ४२.८ र ५३.९ किलोवाट आवर क्षमताको ब्याट्री प्याक पाउन सकिन्छ । एकपटकको सिंगल चार्जमा ५३० किलोमिटरसम्मको सिएलटीसी रेन्ज दिने यस ईभीलाई २० मिनेटमा ३० देखी ८० प्रतिशतसम्म चार्ज गर्न सकिन्छ ।

नयाँ एमजी४ को बाहिरी भागमा नयाँ प्रोजेक्टर हेडलाइटहरू, सेग्मेन्टेड हनीकोम्ब ग्रिल र सार्प फ्रन्ट कर्नरसहितको साइड एयर डक्ट तथा एमजीको उज्यालो लोगो पाउन सकिन्छ । यो कारको लम्बाइ ४३९५ मिमी, चौडाइ १८४२ मिमी र उचाइ १५५१ मिमी तथा ह्वीलबेस २७५० मिमी छ ।

कारको इन्टेरियरमा डिजिटल इन्स्ट्रुमेन्ट क्लस्टर र सेन्ट्रल इन्फोटेनमेन्ट स्क्रिनको प्रभुत्व भएपनि केही बटनहरू समेत राखिएको छ । ट्रिम अनुसार यसमा १०.२५ इन्च, १२.८ इन्च १५.६ इन्चको डिस्प्ले पाउन सकिन्छ । क्वालकम स्न्यापड्रागन ८१५५ चिप जडान गरिएको यस ईभीमा एमजी एक्स र ओप्पो स्मार्ट जस्ता कनेक्टिभिटी सिस्टम प्रयोग गर्न सकिन्छ ।

नयाँ एमजी४ को टप स्पेक ट्रिममा १२ वटा अल्ट्रासोनिक रडार, चार वटा ३६०–डिग्री सराउन्ड भ्यू क्यामेरा र ८ मेगापिक्सेलको फ्रन्ट–फेसिङ क्यामेरा जस्ता फिचर दिइएको छ ।