बीवाईडी सिलायन ७ को बिक्री प्रारम्भ, मूल्य र फिचर यस्तो

काठमाडौं – बीवाईडीको आधिकारिक वितरक साइमेक्स इंकले बीवाईडी सिलायन ७ इलेक्ट्रिक एसयूभीको बिक्री प्रारम्भ गरेको छ ।

साइमेक्स इंकले गत वर्षको नाडा अटो शोमा पहिलो पटक यो गाडी सार्वजनिक गरेको थियो । यद्यपि यसको औपचारिक बिक्री भने अब हुने भएको हो ।

सिलायन ७ एसयूभीको मूल्य ७४ लाख ९९ हजार रुपैयाँ तोकिएको छ । तर अर्ली बर्ड अफरको रुपमा कम्पनीले हाल यसको मूल्य ७२ लाख ९९ हजार रुपैयाँ तोकेको छ ।

हाल नेपाली बजारमा उपलब्ध बीवाइडी सिलायन ७ मा ७१.८ किलोवाट आवरको ब्लेड ब्याट्री प्याक छ । यसले सिंगल चार्जमा ४४० किलोमिटर सम्म रेन्ज दिने कम्पनीले वेबसाइटमै उल्लेख गरेको छ । यसको टप स्पिड २१५ किलोमिटर छ । ३८० एनएम टर्क जेनेरेट गर्ने क्षमता भएको यो गाडीमा ५ व्यक्ति आरामदायी तरिकाले बस्न सकिन्छ ।

बीवाईडीको ई–प्लेटफर्म ३.० मा निर्मित बीवाईडी सिलायन ७ मा बीवाईडी एड्भान्स्ड ड्राइभर असिस्टेन्स सिस्टम (एडास), सीटीबी (सेल–टु–बडी) टेक्नोलोजी, अल्ट्रा–सेफ प्याटेन्टेड ब्लेड ब्याट्री टेक्नोलोजी, डबल विसबोन प्लस मल्टी–लिंक, ३६० डिग्री प्यानोरामिक भ्यु सहितको स्मार्ट एडास र भेइकल टु लोड अर्थात भी२एल लगायतका फिचर छन् ।

बीवाईडी सिलायन ७ ईभीमा सिलमा जस्तै हेडलाइट दिएको छ । साथै यसमा क्लोज अफ ग्रिल, फ्रन्ट बम्परमा एग्रेसिभ कट र क्रिज लाइन, साइडमा १९ इन्चको ड्युअल टोन अलोय ह्विल, २० इन्चको ह्विल विकल्प, फ्लश टाइप डोर ह्यान्डल र आर्कको माथि ब्ल्याक रग्ड क्लेडिङ दिइएको छ

कारको रियरमा पिक्सल डिजाइन एलिमेन्टको साथमा कनेक्टेड एलईडी टेल लाइट र ब्ल्याक रियर बम्पर दिइएको छ । बम्परमा फग ल्याम्प पनि छ । स्टोरेजका लागि यसमा ५८ लिटरको फ्रन्ट र ५२० लिटरको बुट स्पेस दिइएको छ । यसको पछाडिको सिट फोल्ड गरेर बुट स्पेसलाई १७८९ लिटरसम्म बढाउन सकिन्छ।

सिलायन ७ को क्याबिनको ड्यासबोर्डमा हिटेड ग्रिप्स र अडियो फंक्शनको साथमा ४ स्पोक स्टेयरिङ ह्विल र एड्भान्स ड्राइभर असिस्टेन्स सिस्टम उपलब्ध गराएको छ । यसको सेन्ट्रल कन्सोलमा ड्राइभ सिलेक्टर नब, ड्राइभ र टेरेन मोडका लागि बटन र दुई कपहोल्डर उपलब्ध छ ।

सो एसयूभीमा रोटेटेबल १५.६ इन्च टचस्क्रिन, १०.२५ इन्चको डिजिटल ड्राइभर डिस्प्ले, १२ स्पिकर साउन्ड सिस्टम, हेड-अप डिस्प्ले र सनशेडसहितको प्यानोरामिक ग्लासको छत जस्ता फिचर उपलब्ध छ । साथै हिटिङ र भेन्टिलेसन फंक्शन भएको सिट, ५० वाटको वायरलेस फोन चार्जर, कनेक्टेड कार टेक र पावर्ड टेलगेट जस्ता फिचर पनि उपलब्ध गराइएको छ ।

सेफ्टीका लागि यसमा ११ एयरब्याग, ३६० डिग्री क्यामेरा, टायर प्रेसर मोनिटरिङ सिस्टम, फ्रन्ट र रियर पार्किङ सेन्सर जस्ता सुविधा उपलब्ध गराइएको छ। यसमा एडास सिस्टम पनि प्रदान गरिएको छ, जसमा रियर कोलिजन वार्निङ र एडाप्टिभ क्रुज कन्ट्रोल जस्ता फिचर उपलब्ध छ ।