अपडेट भएर आउँदै बजाज डोमिनार २५० र ४००, यस्तो हुनेछ नयाँ संस्करण

बजाजले आफ्नो प्रिमियम मोडल डोमिनार २५० र डोमिनार ४०० को अपडेटेड भर्सन लन्च गर्ने तयारी गरेको छ । बाइक निर्माताले डोमिनार इभोल्भ्ड शब्दसहित डोमिनारको सिल्हूट देखाउने टिजर तस्विर सार्बजनिक गरेर यसबारे जानकारी दिएको हो ।

यी दुवै बाइकमा पल्सर एनएस ४०० जेड जस्तै नयाँ एलसीडी इन्स्ट्रुमेन्ट कन्सोल र नयाँ स्विचगियर उपलब्ध हुनेछ । बजाजका अनुसार, दुबै बाइकमा हाल उपलब्ध इन्धन ट्याङ्कीमा माउन्ट गरिएको सानो एलसीडी डिस्प्ले भने हटाइने छ ।

डोमिनारका यी दुबै मोडलमा मेकानिकल परिवर्तनहरू भने नगरिने भएको छ । जसअनुसार, डोमिनार २५० को २०२५ संस्करणमा उहि पुरानै २४८.७७ सीसी, लिक्विड–कुल्ड, सिंगल–सिलिन्डर इन्जिन प्रयोग गरिनेछ ।

यसैगरी, डोमिनार ४०० मा पनि ३७३.३ सीसी, सिंगल–पोट युनिट प्रयोग गरिनेछ, जसले ३९ बीएचपी र ३५ एनएम टर्क जेनेरेट गर्दछ । दुबै बाइकमा ६–स्पीड गियरबक्स जडान हुनेछ ।

डोमिनारका यी दुबै मोडल नेपाली बजारमा समेत उपलब्ध चर्चित मोटरसाइकल हुन् । हंसराज हुलासचन्द एन्ड कम्पनी प्रालिमार्फत बिक्री हुँदै आएको यी मोटरसाइकलको मूल्य क्रमशः ५ लाख ६० हजार र ६ लाख १४ हजार रुपैयाँ पर्छ ।