कार्बन फाइबरमा युरोपेली प्रतिबन्धको तयारी, अटो उद्योगमा ठूलो असर

युरोपेली संघले स्क्र्याप गरिएका सवारीसाधनको लागि नयाँ नियम मस्यौदा गरेको छ, जसअनुसार कार्बन फाइबरलाई खतरनाक पदार्थको सूचीमा राख्न प्रस्ताव गरिएको छ। यदि नियम कार्यान्वयन भयो भने, २०२९ सम्म युरोपेली बजारमा कार्बन फाइबरको प्रयोग लगभग समाप्त हुनेछ।

कार्बन फाइबरलाई यसको बल र हलुकापनको लागि अटोमोबाइल, विमानन र इलेक्ट्रिक सवारीसाधन क्षेत्रमा व्यापक रूपमा प्रयोग गरिन्छ। विशेष गरी ईभीमा यसको प्रयोगले ब्याट्रीको तौल सन्तुलनमा राख्न मद्दत गर्छ। तर स्क्र्याप गर्दा यसले सूक्ष्म फाइबर कणहरू उत्सर्जन गर्छ, जसले मेसिनहरू बिगार्न र मानव स्वास्थ्यमा गम्भीर असर पार्न सक्छ।

युरोपेली संघले कार्बन फाइबरबाट उत्सर्जित सूक्ष्म कणहरूले कामदारहरू र वातावरणमा नकारात्मक प्रभाव पार्ने ठहर गरेको छ। त्यसैले यसलाई "हानिकारक" घोषणा गर्ने तयारी भइरहेको छ।

नयाँ नियमले टोरे इन्डस्ट्रिज, तेइजिन र मित्सुबिशी केमिकलजस्ता प्रमुख उत्पादकलाई ठुलो असर पार्न सक्छ। सुपरकार निर्माता म्याकलरेन जस्ता ब्रान्डले आफ्नो डिजाइन र सामग्री रणनीति पुनःनिर्धारण गर्नुपर्नेछ। यस निर्णयको प्रभाव युरोप मात्र होइन, विश्वव्यापी अटो उद्योगमा पनि महसुस हुनेछ ।

२०२९ सम्म ईयुको यो निर्णयमाथि नजर राख्नु महत्त्वपूर्ण हुनेछ, किनकि यसको प्रभाव युरोपमा मात्र सीमित हुनेछैन, तर यसले सम्पूर्ण विश्वव्यापी अटो उद्योगलाई असर गर्न सक्छ।