बैंकक इन्टरनेश्नल मोटर शोमा ५८ हजार बढि कार बुकिङ, ईभीमा बीवाईडी पहिलो हुँदा एमजी दोस्रो

काठमाडौं– थाइल्याण्डको राजधानी बैंककमा हालै आयोजना भएको ‘ बैंकक इन्टरनेश्नल मोटर शो’ भब्य रुपमा सम्पन्न भएको छ । मार्च २७ देखी अप्रिल ७ सम्म आयोजना गरिएको उक्त शोमा विश्वका तीन दर्जन बढी कार ब्रान्डले सहभागीता जनाएका थिए ।

‘राइट ह्यान्ड ड्राइभ मार्केट’ का लागि चिनियाँ अटो उत्पादकको प्रोडक्सन हव बन्दै गएको थाइल्यान्डमा यसपटक चिनियाँ अटो ब्रान्डको वर्चश्व रहेको थियो । मोटर शोमा चिनियाँ ब्रान्ड बीवाईडी, एमजी, चांगन, एवोन, ग्रेटवाल मोटर्स, नेटा, जिकर र एक्सपेङले न्यू इनर्जी भेइकललाई प्रदर्शनीमा राखेका थिए ।

१२ दिनसम्म चलेको मोटर शोमा कुल ५८ हजार ६११ कार बुकिङ भएको जनाइएको छ । जसमध्ये ईभीको हिस्सा ३२.७८ प्रतिशत रह्यो । सबैभन्दा बढीे टोयोटाले ८ हजार ५४० यूनिट कार बुकिङ पाएको उक्त मोटर शोमा ५ हजार ३४५ युनिटसहित बीवाईडी दोस्रो, ४ हजार ६०७ युनिटसहित होन्डा तेस्रो र ३ हजार ५१८ युनिटसहित एमजी चौथो धेरै बुकिङ पाउने ब्रान्ड बने ।

टोयोटा र होन्डाले पाएको बुकिङको ठूलो हिस्सा आइसिई कार भएकाले ईभीमा बीवाईडीपछि दोस्रो धेरै बुकिङ एमजीले पाएको हो ।

यसैगरी, पाँचौ धेरै बुकिङ पाउने ब्रान्डमा मित्सुबिसी रह्यो भने चांगन, एवोन, ग्रेटवाल मोटर्स, इसुजु र निसान क्रमशः छैटौ, सातौ, आठौ, नवौ र दशौँ स्थानमा रहे । मेलामा यसपटक अघिल्लो वर्षको तुलनामा २७.५ प्रतिशत बढि कार बुकिङ भएको जनाइएको छ ।