बीवाईडी ई७ को अफिसियल इमेज सार्वजनिक, ट्याक्सीमा प्रयोग हुने

चाइनिज कार निर्माता कम्पनी बीवाईडीले इन्ट्री लेभल ईभी सेडानको रुपमा बीवाईडी ई७ को अफिसियल इमेज सार्वजनिक गरेको छ । बीवाईडी ब्रान्डमा उपलब्ध हुने अफोर्डेबल ई–सिरिज मोडल लाइनअपको एक भागको रुपमा चीनमा यसलाई ट्याक्सी सर्भिसका लागि प्रयोग गरिने छ । यसको अफोर्डेबल मूल्य र स्पेसका कारण धेरैले रुचाउने अनुमान गरिएको छ ।

बीवाईडी ई७ को फ्रन्टमा हेर्दा यो केही मात्रामा हाल उपलब्ध बीवाईडी सिल ईभी सलुन जस्तो लाग्छ । यद्यपि यो फास्टब्याक स्टाइल रुफलाइनका कारण केही अग्लो लाग्छ । बीवाईडीका अन्य नयाँ मोडलमा जस्तै यसमा पनि उही मरिन एस्थेटिक्स डिजाइन ल्यांग्वेज रहेको छ । यसमा एलईडी हेडलाइट, लोअर साइड भेन्ट सहितको ग्रिल–लेस फ्रन्ट बम्पर तथा नोजमा बीवाईडी इम्बलम अप सहितको फ्रन्ट फेस रहेको छ ।

यसमा परम्परागत किसिमको डोर ह्यान्डल रहेको छ भने १६ इन्चको अलोय ह्विल तथा स्प्लिट टेललाइट रहेको छ । यसको लम्बाई, चौडाई र उचाई क्रमशः ४,७८० एमएम, १,९०० एमएम र १,५१५ एमएम छ भने ह्विलबेस २,८२० एमएम छ । यसबाट बीवाईडी ई७ पनि स्लिक सिल ईभी र टेस्ला मोडल ३ जस्तै साइजमा उपलब्ध छ भन्न सकिन्छ ।

साइज र ह्विलबेसका आधारमा बीवाईडी ई७ को क्याबिन र इन्टेरियर स्पेसियस भएको अनुमान गर्न सकिन्छ भने यसको कार्गो स्पेस पनि ठूलो हुन सक्छ । यद्यपि यसको इन्टेरियरको तस्बिर भने सार्वजनिक भएको छैन ।

त्यसैगरी यसको पावरट्रेनको वारेमा पनि जानकारी सार्वजनिक भएको छैन । तर पनि यसमा १०० किलोवाटको मोटर हुने र एलएफपी ब्लेड ब्याट्री हुने अनुमान गर्न सकिन्छ । त्यसैगरी यसको सीएलटीसी रेन्ज ५२० किलोमिटर हुने अनुमान पनि मिडिया रिपोर्टमा उल्लेख गरिएको छ ।

बीवाईडीले यो भन्दा पहिले पनि ई सिरिजको ई६ मोडल बिक्री गरिसकेको छ । नेपाली बजारमा समेत बीवाईडी ई६ पहिले बिक्रीका लागि उपलब्ध थियो । बीवाईडीले हाल यो भर्सन भने बिक्रीका लागि उपलब्ध गराएको छैन ।