यस्तो छ अटो एक्सपो २०२५ मा सार्वजनिक भएको किया ईभी६ फेसलिफ्ट

कियाले भारत मोबिलिटी ग्लोबल एक्सपो २०२५ मा ईभी६ फेसलिफ्ट प्रदर्शन गरेको छ । सो एसयूभी रियर ह्विल ड्राइभ र अल ह्विल ड्राइभ गरी दुई भेरिएन्टमा उपलब्ध हुनेछ ।

ईभी६मा ठुलो ८४ किलोवाट क्षमताको ब्याट्री प्याक उपलब्ध छ । सो एसयूभीले एक पटक चार्ज गर्दा ६५० किलोमिटरभन्दा बढीको रेन्ज दिने कम्पनीको दाबी छ । कारको ब्याट्रीलाई ३५० किलोवाटको फास्ट चार्जरबाट मात्र १८ मिनेटमा १० प्रतिशतदेखि ८० प्रतिशतसम्म चार्ज गर्न सकिन्छ । कम्पनीले यसको बुकिङ पनि सुरु गरिसकेको छ साथै यसको लन्चिङ मार्चमा हुनेछ ।

कम्पनीले किया ईभी६ को लम्बाइ, चौडाइ र उचाइमा कुनै परिवर्तन गरेको छैन । यसको ह्विलबेस पनि पहिले जस्तै २९०० एमएम छ । यद्यपि यसको एलईडी डेटाइम रनिङ ल्याम्पलाई त्रिकोणीय ल्याम्पमा प्रतिस्थापन गरिएको छ र तल्लो ग्रिल सहित बम्परमा साना परिवर्तनले यसलाई थप आकर्षक बनाएको छ । यसको टेल लाइट र रियर बम्परमा पनि साना परिवर्तन गरिएको छ ।

यसको टु–स्पोक स्टेयरिङ ह्विलको दायाँ तर्फ नयाँ किया लोगो थपिएको छ । कारलाई स्टार्ट गर्न फिंगरप्रिन्ट सेन्सर पनि थपिएको छ । यसमा ड्राइभिङका लागि हेडअप डिस्प्ले र डिजिटल रियर भ्यु मिरर उपलब्ध गराएको छ । साथै एआई नेभिगेसन सपोर्ट पनि उपलब्ध छ ।

कियाले कर्भ प्यानोरामिक स्क्रिन यथावत राखेको छ, जसमा इन्स्ट्रयुमेन्ट क्लस्टर र इन्फोटेनमेन्टका लागि १२.३ इन्चको दुईवटा डिस्प्ले प्रदान गरेको छ । यसमा वायरलेस एन्ड्रोइड अटो र एप्पल कारप्ले, एम्बियन्ट लाइटिङ, वायरलेस चार्जर, डिजिटल की, भेइकल–टु–लोड क्षमता र ओभर–द–एयर सफ्टवेयर अपडेट गरिएको छ ।

ईभी६ ले ५ स्टार यूरो एनक्याप रेटिङ प्राप्त गरेको छ । यद्यपि यो प्रि–फेसलिफ्ट थियो जुन २०२२ मा क्रयास परीक्षण गरिएको थियो । यसको एड्भान्स ड्राइभर असिस्टेन्स सिस्टम सुटमा फरवार्ड, रियर र ब्लाइन्ड स्पोट अभोइडेन्स असिस्ट समावेश छ । साथै रिभर्सिङ क्यामेरा सिस्टम तथा फ्रन्ट र रियरमा पार्किङ सेन्सर पनि समावेश छ ।