एमजी विन्डसरले पायो उत्कृष्ट प्रतिक्रिया, पहिलो दिन नै बम्पर बुकिङ

एमजीको नयाँ इलेक्ट्रिक एसयूभी एमजी विन्डसरले ग्राहकहरुबाट उत्कृष्ट प्रतिक्रिया पाएको छ । कम्पनीले सो एसयूभीको बुकिङ अक्टोबर ३ बाट भारतीय बजारमा सुरु गरेको थियो र पहिलो दिन १५ हजार १७६ युनिट बुकिङ भएको थियो । सो इलेक्ट्रिक एसयूभीको मूल्य ९ लाख ९९ हजार भारुबाट सुरु हुन्छ ।

रिपोर्टका अनुसार एमजी विन्डसरको टेस्ट ड्राइभ अक्टोबर १३ बाट सुरु हुने भएको छ । नयाँ एमजी विन्डसरमा ३८ किलोवाटको लिथियम फस्फेट ब्याट्री प्रयोग गरिएको छ, जसमा प्रिज्म्याटिक सेल प्रयोग गरिन्छ । यो ब्याट्रीले इलेक्ट्रिक मोटरमा ऊर्जा पठाउँछ, जुन अगाडिको एक्सलमा राखिएको हुन्छ । सो मोटरले १३४ बीएचपीको पावर र २०० एनएमको टर्क जेनेरेट गर्छ । सो एसयूभी एक पटक पूर्ण चार्ज भएपछि ३३१ किलोमिटरको रेन्ज प्रदान गर्ने एआरएआईले दाबी गरेको छ । यसमा इको, इको प्लस, नर्मल र स्पोर्ट गरी ४ वटा ड्राइभ मोड दिइएको छ ।

एमजी मोटरले ब्याट्री एज ए सब्सक्रिप्शन कार्यक्रम अन्तर्गत विन्डसर ल्याएको छ, जसका कारण कम्पनी यसको मूल्य कम राख्न सफल भएको छ । सो कार्यक्रम अन्तर्गत ग्राहकले ९ लाख ९९ हजार भारु मुल्यमा सो एसयूभी किन्न सक्नेछ तर यसका साथै यसलाई चलाउन प्रति किलोमिटर ३.५ भारु सदस्यता शुल्क तिर्नुपर्नेछ । यस कार्यक्रम अन्तर्गत कार किन्न रुचाउने ग्राहकले विन्डसर ईभी किन्नको लागि १३ लाख ५० हजार भारु मूल्य तिर्नुपर्नेछ ।