हार्ले डेभिड्सन संगको सहकार्यले हिरोलाई भयो फाइदा, माभ्रिक ४४० बेलायतमा पनि लन्च हुने

भारतको सबैभन्दा ठूलो टु–ह्विलर उत्पादक हिरोले पहिलोपटक बेलायतमा आफ्नो मोटरसाइकल लन्च गर्ने भएको छ । हार्ले डेभिड्सन एक्स–४४० मा आधारित नयाँ मोटरसाइकल माभ्रिक–४४० लाई कम्पनीले छिट्टै बेलायती बजारमा लन्च गर्न लागेको हो ।

प्रिमियम ब्राण्ड हार्ले डेभिड्सनसंग सहकार्य गरेपछि हिरोको बाइक बेलायती बजारमा समेत उपलब्ध हुन लागेको र यसले कम्पनीलाई ठूलो फाइदा पुगेको भारतीय मिडियाले टिप्पणी गरेका छन् । बेलायत हुँदै यूरोपका अन्य देश र अमेरिकामा समेत माभ्रिक–४४० लाई लन्च गर्ने हिरो मोटोकर्पले योजना बनाएको छ ।

बेलायतमा सो नयाँ मोटरसाइकलले ट्रायम्फ स्पिड ४०० र रोयल इन्फिल्ड बुलेट ३५० संग प्रतिस्पर्धा गर्ने अनुमान गरिएको छ । ट्रायम्फ स्पिड ४०० को तुलनामा यसको मूल्य आधाले सस्तो हुने कम्पनीको भनाई छ । हिरोले सो नयाँ मोटरसाइकललाई भारतमा १ लाख ९९ हजार भारुमा बिक्री गर्दै आएको छ ।

माभ्रिक ४४० लाई बेलायतमा ए२ लाइसेन्स होल्डरले मात्र प्रयोग गर्न पाउनेछन् । बेलायतमा १९ वर्ष अर्थात सो भन्दा बढी उमेर भएका राइडरले ए२ लाइसेन्स पाउने र उनीहरुले ३५० सिसी भन्दा बढी क्षमताका मोटरसाइकल प्रयोग गर्न पाउने नियम छ ।

माभ्रिक–४४० मा हिरोले ४४० सिसी क्षमताको एयर कुल्ड इन्जिन जडान गरेको छ । जसको पावर २७ बिएचपी र टर्क ३६ एनएम छ । जबकी उसको प्रतिस्पर्धीका रुपमा लिइएको ट्रायम्फ स्पिड ४०० मा ३९८ सिसी क्षमताको इन्जिन दिइएको छ । उक्त इन्जिनले ३९.५ बिएचपी पावर र ३७.५ एनएम टर्क जेनेरेट गर्दछ । दुबै बाइकमा ६ स्पिड गियरबक्स जडान गरिएपनि फिचरमा भने ठुलै अन्तर पाउन सकिन्छ ।