ट्रायम्फ ४०० स्पिडको माइलेज केटीएम ३९० ड्यूकको भन्दा धेरै

ट्रायम्फले बजाजसंगको सहकार्यमा उत्पादन गरेको नयाँ मोटरसाइकल ४०० स्पिडको ‘रियल वल्र्ड फ्यूल इकोनोमी टेष्ट’ सम्पन्न भएको छ । अटोकार इन्डियाले भारतमा गरेको सो टेष्टमा ४०० स्पिडले हाईवेमा प्रतिलिटर पेट्रोलको खपतमा ३३.५७ र सीटीमा ३०.६७ किलोमिटर माइलेज दिएको दावी गरिएको छ ।

केटीएम ३९० ड्यूकको प्रतिस्पर्धीका रुपमा लिइँदै आएको सो मोटरसाइकलको माइलेज ड्यूकको तुलनामा केही वढी हो । अटोकोरा इन्डियाले ३९० ड्यूकको टेष्ट गर्दा हाईवेमा ३०.३६ किलोमिटर र सीटीमा २७ किलोमिटर माइलेज दिएको थियो । सो टेष्टमा ४०० स्पिडले दिएको माइलेज कम्पनीले दावी गरेभन्दा केही वढी हो । कम्पनीले यसको माइलेज औषतमा २९ किलोमिटर रहने वताएको थियो ।

मोटरसाइकलमा ३९८ सिसीको लिक्विड कुल्ड टीआर सिरीज इन्जिन जडान गरिएको छ । जसको अधिकतम पावर ३९.५ एचपी र टर्क ३७.५ एनएम रहेको छ । यसमा टर्क एसिस्ट क्लच सहितको ६ स्पिड गियरवक्स दिइएको छ ।

मोटरसाइकलमा डुअल च्यानल एविएस सहित राइड वाई वायर टेक्नोलोजी, एलसिडी स्क्रिन सहितको ठूलो एनालग इन्स्ट्रयूमेन्ट कन्सोल, ह्यान्डल वार माउन्टेड स्क्रोल वटन र यूएसवी चार्जिङ पाइन्ट लगायत फिचर पाउन सकिन्छ ।