हार्ले डेभिडसनले ल्यायो २ लाख २९ हजार भारुमा सबैभन्दा कम मूल्यको बाइक

हार्ले डेभिडसनले सबैभन्दा सस्तो बाइक हार्ले डेभिडसन एक्स४४० भारतमा लन्च गरेको छ । यो बाइक हार्ले डेभिडसनले हिरो मोटोकर्पको साझेदारीमा विकसित गरेको पहिलो बाइक हो । यो बाइक २ लाख २९ हजार भारु मूल्यमा लन्च गरिएको हो ।

कम्पनीले एक्स४४० डेनिम, भिभिड र एस गरी ३ भेरिएन्टमा लन्च गरेको छ । हार्ले डेभिडसनले एक्स४४० लन्च गर्नुको मुख्य उद्देश्य कम्पनीलाई भारतमा स्थिरता दिनु रहेको बताएको छ । यो बाइकले रोयल इन्फिल्ड क्लासिक ३५०, मेटियोर ३५० र येज्दी रोडस्टर जस्ता बाइकसँग प्रतिस्पर्धा गर्नेछ ।

कम्पनीले यो बाइकलाई रेट्रो क्रुजर लुक दिएको छ । बाइकमा एलईडी हेडलाइटसँगै एलईडी डीआरएल र टर्न इन्डिकेटर पनि दिइएको छ । सो बाइकमा सिंगल पोड इन्स्ट्रयुमेन्ट क्लस्टर, एलसीडी डिस्प्ले र रेट्रो डिजाइन फ्युल ट्यांक उपलब्ध छ । बाइकमा ४४० सीसीको इन्जिन जडान गरिएको छ र बाइकको अगाडि अपसाइड डाउन टेलिस्कोपिक फोर्क सस्पेन्सनका साथै फ्रन्टमा १८ इन्च र पछाडि १७ इन्चको अलोय ह्विल छ ।

हार्ले डेभिडसन एक्स४४० मा कम्पनीले ई२० इन्धन कम्प्लायन्ट इन्जिन जडान गरेको छ, जसले २७ बीएचपीको पावर र ३८ एनएमको टर्क जेनेरेट गर्छ । कम्पनीका अनुसार सो इन्जिन लङ स्ट्रोक हो जसले २ हजार आरपीएममा ९० प्रतिशत टर्क जेनेरेट गर्छ । बाइकको अगाडि ३२० एमएम डिस्क ब्रेकका साथै ड्युअल च्यानल एबीएस जडान गरिएको छ ।