बजाज–ट्रायम्फ सहकार्यमा उत्पादन भएका दुई नयाँ मोटरसाइकल सार्वजनिक

बजाज र ट्रायम्फले सहकार्य गरी उत्पादन गरेका दुई नयाँ मोटरसाइकल सार्वजनिक गरिएको छ । मंगलबार वेलायतमा सार्वजनिक गरिएका यी मोटरसाइकललाई कम्पनीले भारतमा भने जुलाई ५ मा लन्च गर्ने जनाएको छ ।

यी दुई मोडलमध्ये एउटा मोर्डन क्लासिक रोडस्टार स्टाइको स्पीड ४०० र अर्को डुअल स्पोर्ट सेग्मेन्टको स्क्र्याम्व्लर ४०० रहेका छन् । सो बाइक बेलायतको हिंकलेमा डिजाइन र विकास गरिएको हो ।

दुवै मोटरसाइकलमा ३९८ सिसी क्षमताको लिक्विड कुल्ड टीआर सिरीज इन्जिन जडान गरिएको छ । जसको अधिकतम पावर ३९.५ एचपी र टर्क ३७.५ एनएम रहेको छ । यसमा टर्क एसिस्ट क्लच सहितको ६ स्पिड गियरवक्स दिइएको छ ।

मोटरसाइकलमा डुअल च्यानल एविएस सहित राइड वाई वायर टेक्नोलोजी, एलसिडी स्क्रिन सहितको ठूलो एनालग इन्स्ट्रयूमेन्ट कन्सोल, ह्यान्डल वार माउन्टेड स्क्रोल वटन र यूएसवी चार्जिङ पाइन्ट लगायत फिचर पाउन सकिन्छ ।

यी मोटरसाइकललाई बजाजको प्लान्टमा उत्पादन गरी विश्वभर निर्यात गर्ने ट्रायम्फको योजना छ । भारतीय बजारमा यसको मूल्य २ लाख ९५ हजारदेखी ३ लाख १५ हजार भारुसम्म निर्धारण हुनसक्ने आँकलन गरिएको छ ।

यी वाइकले भारतीय बजारमा रोयल इन्फिल्ड स्क्रयाम ४११, येज्दी स्क्रयाम्बलर, जोन्टेस जीके ३५०, नयाँ हार्ले डेभिडसन एक्स४४० र रोयल इन्फिल्ड हन्टर ४५० जस्ता बाइकसँग प्रतिस्पर्धा गर्नेछ ।