दुई मोडलका पल्सर नेपालमा, खुल्यो बुकिङ

काठमाडौं – बजाज बाइकको आधिकारिक वितरक हंसराज हुलासचन्द एन्ड कम्पनीले दुई मोडलका पल्सर बाइकको बुकिङ खुला गरेको छ । नेपालभर रहेका बजाजका शोरुममार्फत यी बाइक बुकिङ गर्न सकिने कम्पनीको भनाइ छ ।

पल्सर एनएस १६० र एनएस २०० बीएस६ भर्सनको बुकिङ खुला गरिएको हो । केही समय पश्चात यी बाइक बिक्रीका लागि उपलब्ध हुने छ ।

अन्य धेरै फिचर पहिलेको मोडलसँग मिल्ने भए पनि यी नयाँ बाइकमा भएको मुख्य परिवर्तन फ्रन्टमा ३३ एमएमको नयाँ अपसाइड डाउन फोर्क हो । आल्मुनियमबाट बनेकोले यसले तौल घटाउनमा समेत सहयोग गर्छ ।

अलोय ह्विल पनि पहिले भन्दा हलुका छ भने फ्रन्टमा ३०० एमएम र रियरमा २३० एमएमको डिस्क ब्रेक छ । पहिले बाइब्री क्यालिपर भएकोमा अहिले ग्रिमेकाको प्रयोग भएको छ भने ड्युअल च्यानल एबीएस स्ट्यान्डर्डको रुपमा रहेको छ ।

इन्स्ट्रयुमेन्ट क्लस्टर उस्तै भए पनि यसमा अब गियर पोजिसन इन्डिकेटर, फ्युल इफिसियन्सी, डिस्टेन्स टु इम्पटी अदि फिचर देखाउने सुविधा छ ।

बजाज पल्सर एनएस २०० बीएस६ को मूल्य ४ लाख २४ हजार ९ सय र एनएस १६० बीएस६ को मूल्य ३ लाख ८४ हजार ९ सय रुपैयाँ तोकिएको छ ।