हिरो एक्सट्रिम १६०आर को अपडेट भर्सन लन्च, ड्युअल च्यानल एबीएस र फुल्ली डिजिटल मिटर समावेश

हिरो मोटोकर्पले एक्सट्रिमको अपडेट भर्सन २०२३ एक्सट्रिम १६०आर ४भी भारतमा लन्च गरेको छ । कम्पनीले यो १६० सीसी सेग्मेन्टमा भारतको सबैभन्दा सस्तो र हल्का बाइक भएको दाबी गरेको छ । सो बाइक फुल्ली डिजिटल कन्सोल र ड्युअल च्यानल एबीएससहित उपलब्ध छ ।

कम्पनीले यो बाइकलाई स्ट्यान्डर्ड, कनेक्टेड र प्रो गरी ३ भेरिएन्टमा लन्च गरेको हो । यसको मूल्य १ लाख २७ हजार देखि १ लाख ३६ हजार भारु सम्म राखिएको छ । सो बाइक ३ कलरमा उपलब्ध छ । नयाँ एक्सट्रिमले बजाज पल्सर, टीभीएस अपाचे आरटीआर १६० ४भी र यामाहा एफजेड एफआईसँग प्रतिस्पर्धा गर्नेछ ।

सो बाइकमा १६३ सीसी सिंगल सिलिन्डर आयल कुल्ड इन्जिन जडान छ, जसले ८५०० मा १६.६ बीएचपी पावर र १४ एनएमको टर्क जेनेरेट गर्छ । यो इन्जिन ५ स्पिड गियरबक्ससँग जोडिएको छ ।

नयाँ एक्सट्रिम १६०आर ४भीमा नयाँ ग्राफिक्स, नयाँ डिजाइनको इन्धन ट्यांकी, अगाडि अपसाइड डाउन फोर्क, एलईडी हेडलाइट र डेटाइम रनिङ लाइट समावेश छ । यद्यपि यसको पछाडिको सक एब्जर्बरमा भने कुनै परिवर्तन भएको छैन ।

ब्रेकिङका लागि अगाडि २७६ एमएमको पेटल डिस्क छ । साथै भेरिएन्ट अनुसार पछाडि २२० एमएम पेटल डिस्क वा १३० एमएम ड्रम ब्रेक दिइनेछ । यस बाइकको अगाडि १००/८० ट्युबलेस टायर र पछाडि १३०/७० ट्युबलेस टायर सहित १७ इन्च अलोय ह्विल उपलब्ध छ ।