बजाजका ४०० सीसी र २५० सीसी बाइकमा ५ हजार मात्र फरक : फाइनान्स जात्राले झन सहज

काठमाडौं – नेपाली बजारमा बिक्री भइरहेका बजाजका दुई मोटरसाइकल डोमिनार ४०० र डोमिनार २५० को मूल्य लगभग उही छ । पहिले मूल्य फरक भए पनि केही दिन पहिले सार्वजनिक बजेटले ४०० सीसीको मोटरसाइकललाई बढी छुट प्रदान गरिएको र मूल्य समायोजन गर्दा यस्तो मूल्य हुन गएको हो ।

बजाज डोमिनार ४०० को मूल्य ५ लाख ९९ हजार ९ सय र डोमिनार २५० को मूल्य ५ लाख ९४ हजार ९ सय रुपैयाँ छ । यसकारण हाल यी दुई मोटरसाइकलको मूल्यमा ५ हजार रुपैयाँ मात्र फरक छ । यसकारण डोमिनार ४०० मन पराउनको लागि हाल निकै नै सहज भएको छ ।

यो भन्दा पहिले डोमिनार ४०० को मूल्य ६ लाख ५९ हजार ९ सय रुपैयाँ थियो । केही दिन पहिले मात्र यसको मूल्यमा एकै पटक ६० हजार रुपैयाँले कमी आएको हो ।

हाल बजाजले काठमाडौं उपत्यकामा फाइनान्स जात्रा नामक स्किम सञ्चालन गरिरहेको छ । यस अनुसार शून्य प्रतिशत ब्याजदरमा आफूले चाहेको मोडल लिन सकिन्छ ।

यो अवस्थामा डोमिनार ४०० चाहिं मासिक किस्ता १६ हजार ६६४ र डोमिनार २५० चाहिं मासिक किस्ता १६ हजार ६२५ को दरले तिर्ने गरी लिन सकिन्छ ।

यस्ता छन् दुई मोटरसाइकल
बजाज डोमिनारलाई कम्पनीले डोमिनार ४०० कै अवधारणामा निर्माण गरेको हो । बजाज डोमिनार ४०० र २५० मा धेरै समानता रहेको छ । झट्ट हेर्दा दुबै मोटरसाइकल समान देखिन्छ । तर, यी दुई मोटरसाइकलमा मेकानिकल परिवर्तन धेरै रहेको छ ।

डोमिनार ४०० मा ३७३ सीसीको इन्जिन छ भने, डोमिनर २५० मा २४८ सीसी इन्जिन रहेको छ । दुवै मोटरसाइकलमा ६ स्पिड गियर र स्लिपर क्लच रहेको छ ।

दुबै मोटरसाइकलको डाइमेन्सन समान रहेको छ । यी बाइकको तौल १८२ केजी, लम्वाई २१५६ एमएम, चौडाई ८१३ एमएम, उचाई १११२ एमएम, ह्विलबेस १४५३ र ग्राउन्ड क्लियरेन्स १५७ एमएम रहेको छ ।

यी दुबै मोटरसाइकलमा १७ इन्च अलोय ह्विल रहेको छ । यसका साथै यी दुबै मोटरसाइकलमा डबल च्यानल एबीएस उपलब्ध रहेको छ ।

यी दुबै मोटरसाइकलमा एलईडी हेडल्याम्प तथा टेलल्याम्प रहेको छ । कम्पनीले डोमिनार ४०० को कन्सोललाई नै २५० मा प्रयोग गरेको छ । फ्युल ट्यांकमा सानो डिस्प्ले छ र ओडोमिटर टाइम र गियर इन्डिकेटर रहेको छ ।

यी दुबै मोटरसाइकलमा सानो विन्डस्क्रिन, मस्कुलर फ्युल ट्यांक, इन्जिन कौल, सिग्नेचर एलईडी हेडल्याम्प, ट्विन ब्यारेल एक्जस्ट। अलोय ह्विल, स्प्लिट सिट जस्ता मुख्य फिचर रहेका छन् ।