रोयल इन्फिल्ड, होन्डा र हिरो मोटरसाइकल नेपालमै एसेम्बल हुने, दर्ता भए तीन उद्योग

नेपालमै मोटरसाइकल एसेम्बल गर्नका लागि चालु आर्थिक वर्षमा उद्योग विभागमा तीन एसेम्बलिङ उद्योग दर्ता भएका छन् । उद्योग विभागमा रोयल इन्फिल्ड, होन्डा र हिरो मोटोकर्पले मोटरसाइकल तथा स्कुटर स्वदेशमै एसेम्बल गर्ने गरी उद्योग दर्ता गरेका छन् ।

रोयल इन्फिल्डका मोटरसाइकल नेपालमा उत्पादन गर्नका लागि टीजी अटो ग्रुप दर्ता भएको छ । बारा जिल्लाको जीतपुरसिमरा उपमहानगपालिका वडा नम्बर ९ मा स्थापना हुने गरी टीजी अटो ग्रुप प्रालिको दर्ता गत भदौँ २ गते भएको हो । यसका लागि ३८ करोड लगानी हुनेछ भने वार्षिक ८ हजार मोटरसाइकल उत्पादन गरिने छ । यसमा ६७ जनाले रोजगार पाउने छन् । यसमा ३८ करोड रुपैयाँ लगानी हुनेछ भने वार्षिक ८ हजार मोटरसाइकल उत्पादन गर्ने क्षमता हुनेछ । टीजी अटो ग्रुपमा ६७ जनाले रोजगारी पाउने छन् ।

नेपालमा होन्डा मोटरसाइकल र स्कुटर एसेम्बल गर्नका लागि हिमाल मोटो नेपाल गत भदौ २३ गते दर्ता भएको छ । रुपन्देही जिल्लाको रोहिणी गाउँपालिका वडा नम्बर ४ मा एसेम्बलिङ प्लान्ट रहने सो उद्योगमा ६० करोड रुपैयाँ लगानी हुनेछ । वार्षिक २५ हजार मोटरसाइकल र ७५ हजार स्कुटर एसेम्बल गर्ने क्षमता भएको हिमाल मोटो नेपालमा २०२ जनाले रोजगारी पाउने छन् ।

हिरोका मोटरसाइकल र स्कुटर एसेम्बलिङ गर्ने उद्येश्यका साथ स्थापना भएको एनजीएम इन्जिनियरिङ एन्ड सेल्समा ३३ करोड रुपैयाँ लगानी हुनेछ । वार्षिक ४५ हजार मोटरसाइकल एसेम्बल गर्ने क्षमता भएको उद्योगमा १३० जनाले रोजगारी पाउने छन् । गत भदौ २० मा सो उद्योग दर्ता भएको थियो ।