यो वर्ष विश्वमा १ करोड ४० लाख इभी बिक्री हुने, इन्ट्रि लेभल इभीको मूल्य कम हुने अनुमान

यो वर्ष विश्वमा १ करोड ४० लाख इभी बिक्री हुने प्रक्षेपण गरिएको छ । इन्टरनेश्नल इनर्जी एजेन्सि(आइईए) ले सन् २०२३ मा विश्वभर इभीको बिक्रीमा उच्च बृद्धि हुने प्रक्षेपण गरेको हो । सन् २०२२ मा १ करोड हाराहारी इभी बिक्री भएको र यो वर्ष उक्त संख्यामा ३५ प्रतिशतले बृद्धि भई १ करोड ४० लाख पुग्ने सो एजेन्सिको दावी छ ।

इभीमा उपभोक्ताको रुची बढ्दै जानु र विश्वका कैयन राष्ट्रले यस्ता साधनको प्रवद्र्धनमा सरकारी तवरबाटै जोड दिँदै गएका कारण आगामी वर्षहरुमा इभीको बिक्रीले उच्च गती लिने देखिएको हो । इभीको बिक्री वढेसंगै उत्पादकले यस्ता साधनको उत्पादन बढाउँदै जाने र फलस्वरुप यसै वर्षदेखी इन्ट्रि लेभल र मिडियम साइजका इभीको मूल्य समेत सस्तिने आँकलन आइईएले गरेको छ ।
‘यो वर्षबाटै कम्वस्चन इन्जिन जडित गाडीको तुलनामा साना इभीको मूल्य सस्तो हुँदै जाने देखिएको छ । एसयूभी र पिकअप इभीको मूल्य भने सन् २०३० देखीमात्र सस्तो पर्ने देखिन्छ’ एजेन्सिका इनर्जी टेक्नोलोजी पोलिसी हेड तिमार गीलले वताए ।

पछिल्लो समय प्यासेन्जर कारमा मात्र नभई इभीको प्रयोग फ्लिट, कमर्सियल भेइकल, एचसिभी र वसमा समेत वढ्दै गएको छ । गत वर्ष भारतमा दर्ता भएको थ्री ह्विलरको कुल संख्याको आधाभन्दा वढी इलेक्ट्रिक रहेको समेत सो एजेन्सिको भनाई छ ।

इभीको प्रयोग वढेसंगै पेट्रोलियम उद्योगको भविष्य थप संकटमा पर्दै जाने र सन् २०३० देखी इभीकै कारण हरेक दिन ५० लाख ब्यारेल पेट्रोलियम वचत हुने आइईएले निश्कर्ष निकालेको छ ।