८ लाख भारुमा लन्च भयो एमजी कोमेट ईभी

एमजीले भारतका लागि नयाँ इलेक्ट्रिक कार कोमेट ईभी लन्च गरेको छ । यसको मूल्य ७ लाख ९८ हजार भारु तोकिएको छ ।

भारतमा अप्रिल २७ देखि यसको टेस्ट ड्राइभ र बुकिङ मे १५ देखि गर्न सकिने छ । यसको डेलिभरी पनि त्यही समयमा शुरु हुनेछ ।

इन्डोनेसियन कम्पनी वुलिङ एयर ईभीमा आधारित कोमेट ईभीमा बक्सी डिजाइन ल्यांग्वेज छ भने पुरै फराकिलो एलईडी लाइट बार जस्तो आकर्षक टच उपलब्ध छ, जसलाई एमजीले एक्सटेन्डेड होराइजन कनेक्टिङ लाइट भनेको छ ।

दुवै विङ मिररलाई जोड्नका लागि यसको साथमा क्रोम र पियानो ब्ल्याक स्ट्रिम छ । लाइट बारको तल्लो भागमै यसको चार्जर राखिएको छ ।

यसमा १२ इन्चको अलोय ह्विल छ, जुन हाल बजारमा उपलब्ध कुनै पनि कारमा भएको सबैभन्दा सानो ह्विल हो । पछिल्लो भागमा पनि एक्सटेन्डेड होराइजन कनेक्टिङ लाइट छ । यो विभिन्न ५ आकर्षक कलरमा उपलब्ध हुनेछ ।

यसको इन्टेरियर ह्वाइट र ग्रे कलरयुक्त छ भने इन्फोटेनमेन्ट सिस्टम र डिजिटल इन्स्ट्रयुमेन्टका लागि दुई १०.२५ इन्चका स्क्रिन छन् । यसमा रोटरी ड्राइभ सेलेक्टर छ ।

कोमेट ईभीमा वायरलेस एन्ड्रोइड अटो र एप्पल कारप्ले, म्यानुअल एसी कन्ट्रोल, किलेस इन्ट्री, स्टेयरिङ माउन्टेड कन्ट्रोल, तीन यूएसबी पोर्ट र ५५ वटाभन्दा बढी कनेक्टेड फिचर उपलब्ध छन् । कोमेट ईभीमा भएका सेफ्टी फिचरहरूमा एबीएस, ईबीडी, टीपीएमएस, रिभर्स क्यामेरा र सेन्सरका साथै ड्युअल फ्रन्ट एयरब्यागहरू समावेश छन्।

एमजीले कोमेट ईभीमा १७.३ किलोवाट आवरको ब्याट्री प्रयोग गरेको छ, जुन पानी र धुलोबाट बच्ने विशेषता सहितको छ । यसले २३० किलोमिटरको रेन्ज दिने बताइएको छ । कम्पनीले नै उपलब्ध गराउने ३.३ किलोवाटको अनबोर्ड चार्जरले यसलाई ७ घण्टामा फुल चार्ज गर्न सकिन्छ ।