लन्च हुनुअघि टाटाको नयाँ इलेक्ट्रिक ट्रकले मच्चायो, हंगामा, पायो ३९ हजार अर्डर

टाटा मोटर्सले आफ्नो लोकप्रिय मिनी ट्रक टाटा एसको इलेक्ट्रिक भेरिएन्ट भारतमा सार्वजनिक गरेको छ । एस ईभी नाम दिइएको सो मिनी ट्रक आपूर्तिको लागि कम्पनीले अमेजन, बिगबास्केट, सिटी लिंक, डट, फ्लिपकार्ट, लेट्स ट्रा सपोर्ट, मुभिङ र यलो ईभी जस्ता प्रमुख ई–कमर्स कम्पनीसँग सम्झौता गरेको छ । टाटा मोटर्सले लन्च हुनुअघि नै यी कम्पनीबाट ३९ हजार युनिटको अर्डर प्राप्त गरिसकेको छ ।

एस इलेक्ट्रिक भेरिएन्टमा ब्लुटुथ कनेक्टिभिटी सहितको ७ इन्चको इन्फोटेनमेन्ट सिस्टम रहेको छ । साथै इन्स्ट्रयुमेन्ट क्लस्टर र इन्फोटेनमेन्ट सिस्टम सेन्टर ड्यासमा जडान गरिएको छ । ट्रकमा रियर पार्किङ क्यामेरा, टायर प्रेसर मोनिटरिङ सिस्टम जस्ता फिचर पनि छ ।

कम्पनीका अनुसार सो इलेक्ट्रिक ट्रकले सिंगल चार्जमा १५४ किलोमिटरको रेन्ज दिने छ । यसमा ३६ हर्सपावरको मोटर जडान गरिएको छ ।

टाटा ग्रुपका अध्यक्ष एन चन्द्रशेखरनले विश्वव्यापी रुपमा इलेक्ट्रिक भेइकलको माग बढिरहेको बताए । यसको लागि दिगो गतिशीलता आवश्यक भएको छ । टाटा मोटर्सले यसलाई पूर्ण रूपमा आत्मसात गरेको छ र एक प्रमुख स्तम्भको रूपमा दिगोपनलाई जोड्ने व्यापार मोडेल सिर्जना गरेको छ । उनले ई–कमर्स द्रुत गतिमा बढिरहेको र घर–घरमा सामान वितरणको माग बढिरहेको पनि जानकारी दिए ।

नेपाली बजारमा पनि सामान ओसारपसार गर्नका लागि टाटा एस पिकअप लोकप्रिय छ । यसको इलेक्ट्रिक भर्सन पनि भविष्यमा नेपाली बजारमा आउने अनुमान गर्न सकिन्छ ।