सुरक्षामा अब्बल १० एसयुभी : ६ वटा मोडल नेपाली बजारमा, ४ वटा प्रतिक्षारत

ग्लोवल एनक्यापले भारतमा गरेको क्र्यास टेष्टमा अब्बल साबित १० एसयुभीमध्ये ६ वटा मोडल नेपाली बजारमा उपलब्ध छन् । यी मध्ये महिन्द्रा एक्सयुभी ३०० र टाटा नेक्सनले ५ स्टार रेटिङ हात पारेका छन भने निशान म्याग्नाइट, रेनो काइगर र सुजुकी ब्रेजाले ४ स्टार रेटिङ हात पारेका छन । उक्त टेष्टमा हुन्डाई क्रेटाले भने जम्मा ३ स्टार रेटिङ मात्र पाएको छ ।

नेपाली बजारमा आउन बाँकी महिन्द्रा एक्सयुभी ७०० र टाटा पन्चले पनि ५ स्टार रेटिङ पाएको छ । त्यसैगरी अन्य २ एसयुभी महिन्द्रा थार र टोयोटा अर्वान क्रुजले भने ४ स्टार रेटिङ हात पारेको छ । यी एसयुभी नेपाल भित्रिने प्रतिक्षामा रहेको भनिएपनि कहिले आउँछ भन्ने विषय हालसम्म टुंगो नलागिसकेको सम्वन्धित आयतकर्ता कम्पनीहरुले बताउँदै आएका छन् ।
एडल्ट प्रोटेक्सनमा १७ मध्ये १६.४२ प्वाइन्ट प्राप्त गर्दै ५ स्टार रेटिङ हात पारेको महिन्द्रा एक्सयुभी ३०० ले चाइल्ड प्रोटेक्सनमा भने ३७.४४ प्वाइन्ट प्राप्त गर्दै ४ स्टार रेटिङ पाएको छ । कुल ६६ प्वाइन्टमध्ये ५३.८६ प्वाइन्ट प्राप्त गर्दै यो एक अव्वल एसयुभीका रुपमा दर्ज भएको हो । पेट्रोल र डिजेल दुबै इन्जिनमा उपलब्ध यो एसयुभीको पेट्रोल भेरियन्टको मूल्य नेपाली बजारमा ३९ लाख ७५ हजारदेखी ५६ लाख ५० हजारसम्म र डिजेल भेरियन्टको ४१ लाख २५ हजारदेखी ५७ लाख २५ हजार रुपैयाँसम्म निर्धारण गरिएको छ ।

एडल्ट प्रोटेक्सनमा ५ स्टार रेटिङ पाएको अर्को लोकप्रिय एसयुभी टाटा नेक्सनले भने चाइल्ड प्रोटेक्सनमा ३ स्टार रेटिङ हाँसिल गरेको छ । यो एसयुभीले कुल ६६ प्वाइन्टमध्ये ३६.७३ प्वाइन्ट प्राप्त गर्दै उक्त रेटिङ हात पारेको हो । पेट्रोल इन्जिनमा उपलब्ध नेक्सनको कुल ७ वटा भेरियन्ट नेपाली बजारमा उपलब्ध रहँदै आएको छ । यो एसयुभीको मूल्य ४० लाख ९९ हजारदेखी ५४ लाख ९९ हजार रुपैयाँसम्म निर्धारण गरिएको छ ।

सवफोर मिटर सेग्मेन्टमा सर्बाधिक सफल र लोकप्रिय मानिँदै आएको निशान म्याग्नाइटले एडल्ट प्रोटेक्सनमा ४ स्टार र चाइल्ड प्रोटेक्सनमा २ स्टार रेटिङ हात पारेको छ । यो एसयुभीले कुल ६६ प्वाइन्टमध्ये ३६.७३ प्वाइन्ट प्रात्प गर्दै उक्त रेटिङ हाँसिल गरेको हो । कुल ११ भेरियन्टमा उपलब्ध यो एसयुभीको मूल्य नेपाली वजारमा ३२ लाखदेखी ४६ लाख ३४ हजार रुपैयाँसम्म निर्धारण गरिएको छ ।

एडल्ट प्रोटेक्सनमा ४ स्टार रेटिङ पाएको अर्को लोकप्रिय मिड साइज एसयुभी ब्रेजाले पनि चाइल्ड प्रोटेक्सनमा भने जम्मा २ स्टार रेटिङ प्राप्त गरेको छ । यो एसयुभीले कुल ६६ प्वाइन्टमध्ये ३०.४४ प्वाइन्ट पाएर उक्त रेटिङ हाँसिल गरेको हो । यो एसयुभीलाई ग्लोवल एनक्यापले सन् २०१८ मा क्र्यास टेष्ट गरेको थियो । कुल ३ भेरियन्टमा मात्र उपलब्ध यो एसयुभीको मूल्य नेपाली बजारमा ४३ लाख ४९ हजारदेखी ४८ लाख ५४ हजार रुपैयाँसम्म निर्धारण गरिएको छ ।

यसैगरी रेनो काइगरले पनि एडल्ट प्रोटेक्सनमा ४ स्टार र चाइल्ड प्रोटेक्सनमा २ स्टार रेटिङ प्राप्त गरेको छ । यो एसयुभीले कुल ६६ प्वाइन्टमध्ये ३३.३९ प्वाइन्ट पाएर उक्त रेटिङ हाँसिल गरेको हो । कुल ५ भेरियन्टमा उपलब्ध यो एसयुभीको मूल्य ३० लाखदेखी ४४ लाख रुपैयाँसम्म निर्धारण गरिएको छ ।

कम्प्याक्ट एसयुभी सेग्मेन्टमा मार्केट लिडरको पहिचान बनाउन सफल हुन्डाई क्रेटाले भने एडल्ट र चाइल्ड दुबै प्रोटेक्सनमा ३ स्टार रेटिङ हात पारेको छ । यो चर्चित एसयुभीले कुल ६६ प्वान्टमध्ये ३६.२९ प्वाइन्ट प्राप्त गर्दै उक्त रेटिङ हाँसिल गरेको हो । पेट्रोल र डिजेल दुबै इन्जिन गरी कुल १० वटा भेरियन्टमा उपलब्ध यसको डिजेल भेरियन्टको मूल्य ४६ लाख ५६ हजारदेखी ५८ लाख ५६ हजारसम्म र पेट्रोलको ४७ लाख ०६ हजारदेखी ७५ लाख ९६ हजार रुपैयाँसम्म निर्धारण गरिएको छ ।