बीएस६ यामाहा एमटी–१५ दसैं सम्म आउने, एफजेड–एक्स र एफजेडएस भी३ को सम्भावना कम

काठमाडौं – यामाहाका हालै अन्तर्राष्ट्रिय बजारमा सार्वजनिक गरिएका विभिन्न मोडल मध्ये एमटी–१५ को बीएस६ इन्जिनयुक्त मोडल दसैं सम्म नेपाली बजारमा उपलब्ध हुने भएको छ । नेपालका लागि यामाहाको आधिकारिक वितरक एमएडब्ल्यु इन्टरप्राइजेजले उक्त मोटरसाइकल चाडपर्वलाई लक्ष्यित गरी दसैं सम्म नेपाली बजारमा उपलब्ध हुने बताएको छ ।

यद्यपि यामाहाका दुई मोडल एफजेड–एक्स १५० र एफजेडएस भी३ भने दसैं सम्म नेपाली बजारमा उपलब्ध हुने सम्भावना कम देखिएको छ । हालै बढाइएको अन्तशुल्कले समेत यसमा असर पार्ने भएको छ भने नेपाल भित्र्याउने तयारी थालेको भए पनि तिहार सम्ममा पनि नेपाली बजारमा उपलब्ध हुने सम्भावना समेत कम हुँदै गएको कम्पनी स्रोतले बताएको छ ।

एमटी–१५ मा बीएस६ मापदण्डयुक्त १५५ सीसी लिक्विडकुल्ड फोरस्ट्रोक एसओएचसी फोर भल्व इन्जिन हुनेछ, जसले १८.५ पीएस पावर र १३.९ एनएम टर्क जेनेरेट गर्छ । पहिले बजारमा उपलब्ध बीएस४ इन्जिनयुक्त एमटी–१५ को तुलनामा यसमा मेकानिकल बाहेक अन्य कुनै फिचरमा परिमार्जन गरिएको छैन । यसको अगाडि कन्भेन्सनल टेलिस्कोपिक फोर्क र पछाडि मोनोसक दिइएको छ । डिजिटल इन्स्ट्रयुमेन्ट कन्सोल रहेको यो मोटरसाइकलमा एलइडी हेडलाईट र एबीएसको विशेषता रहेको छ ।

हाल नेपाली बजारमा उपलब्ध बीएस४ इन्जिनयुक्त एमटी–१५ को मूल्य ४ लाख ४२ हजार ९ सय रुपैयाँ छ । नयाँ बीएस६ इन्जिनयुक्त मोटरसाइकल नेपाली बजारमा उपलब्ध भएमा यसको मूल्य हालको मोडल भन्दा १० हजार देखि २० हजार रुपैयाँ सम्म बढी हुने अनुमान गर्न सकिन्छ ।