टाटा गाडी किन्ने ग्राहकलाई एसबीआई बैंकले ८० प्रतिशत सम्म कर्जा प्रदान गर्ने

काठमाडौं – नेपाल एसबीआई बैंक र सिप्रदी ट्रेडिङबीच हायर पर्चेज कर्जा प्रदान गर्ने सम्बन्धी सम्झौता भएको छ । जसअनुसार टाटाका गाडी खरिद गर्नका लागि ग्राहकलाई बैंकले विशेष सहुलियतयुक्त दरमा कर्जा प्रदान गर्नेछ ।

उक्त सम्झैतामा बैंकका रिटेल तथा एसएमई प्रमुख बद्रीलाल अमात्य र सिप्रदी ट्रेडिङ प्रालिका बिक्री तथा प्रवद्र्धन महाप्रबन्धक अनुपमणी ढकालले हस्ताक्षर गरेका छन् ।

बैंकले कमर्सियल गाडीमा ७० प्रतिशत सम्म व्यक्तिगत कर्जाका लागि र ७५ प्रतिशत सम्म कम्पनी प्रयोजनका लागि कर्जा प्रदान गर्नेछ । त्यसैगरी विद्युतीय गाडीमा ८० प्रतिशत सम्म कर्जा प्रदान गर्नेछ ।

व्यक्तिगत गाडीका लागि ८ दशमलव ५ प्रतिशत र कमर्सियल गाडीका लागि ९ दशमलव ९९ प्रतिशत ब्याजदरमा कर्जा प्रवाह गरिने छ ।

बैंकले हाल ८८ शाखा कार्यालय, १९ वटा एक्सटेन्स काउन्टर, ७ प्रादेशिक कार्यालय तथा एउटा कर्पोरेट कार्यालयका साथै १२२ एटीएमबाट आफ्नो सेवा प्रदान गर्दै आएको छ ।