८०० भन्दा बढी ओमोडा र जेइको कार नेपाली सडकमा, मनाइयो उत्सव

काठमाडौं - नेपाली सडकमा ८ सय भन्दा बढी ओमोडा र जेइकोका ईभी बिक्री भएका छन् । नेपालका लागि यी दुई ब्रान्डको आधिकारिक वितरक सारडा ग्रुप अन्तर्गतको एसपीजी अटोमोबाइल्सले एक कार्यक्रमका बिच सो उत्सव मनाएको छ । यो उपलब्धि मनाउन काठमाडौंको उत्तरढोका सोरूममा उत्सव कार्यक्रम आयोजना गरिएको थियो ।

कार्यक्रममा प्रतिष्ठित क्रिकेट खेलाडी एवम् ओमाडा एन्ड जेइकोका ब्रान्ड एम्बेसडर दीपेन्द्र सिंह ऐरी उपस्थित भएका थिए, जसले यस उल्लेखनीय उपलब्धिलाई सम्बोधन गर्न कार्यक्रममा सहभागिता जनाए । साथै, एसपीजी टिमबाट गौरव शारडा (निर्देशक), धिरेन तामाङ (ग्रुप अध्यक्ष), ज्ञानेन्द्र बहादुर चन्द (महाप्रबन्धक, सेल्स एन्ड मार्केटिङ) र राजेन्द्र तिमिलसेना (महाप्रबन्धक, फाइनान्स) पनि उपस्थित थिए ।

कार्यक्रमको विशेष आकर्षण ८०० भन्दा बढी ओमोडा जेइकोको विक्री समारोहमा ओमोडा एन्ड जेइकोका ब्रान्ड एम्बेसेडर दीपेन्द्र सिंह ऐरीसँग उत्सव मनाउनु थियो । यस अवसरमा अतिथिहरूलाई ब्रान्ड एम्बेसडरसँग संवाद गर्ने, ओमाडा एन्ड जेइकोका मोडेलहरू अवलोकन गर्ने, र नेपालको सन्दर्भमा ब्रान्डको यात्रा तथा भविष्यबारे जानकारी प्राप्त गर्ने मौका प्रदान गरियो ।

नेपाली बजारमा ओमोडा ई५ गत वर्षको फेब्रुअरी प्रारम्भमा बुकिङ खुला गरिएको थियो र नेपाली नयाँ वर्ष लाग्दै गर्दा बैशाखको पहिलो साता १५१ गाडी डेलिभरीको उत्सव मनाइएको थियो ।

त्यसैगरी जेइको जे६ नेपालका लागि पहिलो अफरोडर ईभी एसयूभी हो । गत भदौ महिनामा सम्पन्न नाडा अटो शो २०२४ मा पहिलो पटक प्रदर्शन गरिएको जेइको जे६ असोज महिना पश्चात बिक्रीका लागि उपलब्ध गराइएको थियो ।

ओमोडा ई५ मा ६१ किलोवाट आवरको लिथियम आइरन फस्फेट ब्लेड ब्यट्री रहेको छ, जसले डब्ल्युएलटीपी मानक अनुसार ४३० किलोमिटरको रेन्ज प्रदान गर्दछ । सो गाडी फ्रन्ट माउन्टेड इलेक्ट्रिक मोटर र ३४० एनएमको टर्कद्वारा संचालित छ । यात्रु तथा चालकका लागि यसमा २.५ लेभलको महत्वपूर्ण एडास फिचर रहेका छन् ।

चेरीको सहायक ब्राण्ड ओमोडा–जेइकोले उत्पादन गरेको ‘जेइको जे६’ चेरीकै आई कार हो । अगाडि लोगोदेखि सबै लाइट आई अक्षरमा डिजाइन गरिएको ‘जेइको जे६’ मा मस्कुलर बम्पर, १८ इन्चको स्मार्ट अलोय ह्वील, वेलकम लाइट, मस्कुलिङ ह्वील आर्क र दुई हेडलाइटको बीचमा दिइएको ब्ल्याक फिनिस प्यार्टनले यो अफरोड भेइकललाई मोन्स्टर बनाएको छ ।

यसको मोटर १३५ किलोवाट पीक पावरको छ । यसमा ब्याट्री भने सीएटीएलले उत्पादन गरेको ६५.६९ किलोवाट आवरको लिथियम आइरन फस्फेट दिइएको छ । यसको डब्लूएलटीपी रेन्ज ४०० किलोमिटर हो ।