मूल्य बढ्दा पनि उस्तै क्रेज : २०२२ क्रसएक्स २५०आर नेपालमा, अब बुकिङ गर्नेले पछि मात्र पाउने

काठमाडौं – नेपाली बजारमा २०२२ मोडलको क्रसएक्स २५०आर भित्रिएको छ । ईएफआई युरो ५ प्रविधियुक्त यो मोटरसाइकलको मूल्य ८ लाख ७५ हजार रुपैयाँ तोकिएको छ ।

यो भन्दा पहिले यो मोटरसाइकलको मूल्य ६ लाख ९५ हजार रुपैयाँ थियो । नयाँ ईएफआई प्रविधियुक्त क्रसएक्स २५०आर मोटरसाइकलको मूल्य ७ लाख ६५ हजार रुपैयाँ तोकेर नेपालका लागि क्रसएक्सको आधिकारिक वितरक बाइकर्स नेपालले गत पुस महिनामा बुकिङ खुला गरेको थियो । हाल त्यस पश्चात बुकिङ खुला गरिएका ग्राहकका लागि यो मोटरसाइकल उपलब्ध भएको हो ।

सरकारले हालै नयाँ बजेटमार्फत कर बढाएकाले अब यो मोटरसाइकलको मूल्य ८ लाख ७५ हजार रुपैयाँ तोकिएको छ । यस अनुसार पहिले नै बुकिङ गरेकाले पनि अब नयाँ मूल्यमै मोटरसाइकल पाउने छन् । अब बुकिङ गर्नेका लागि भने मोटरसाइकल पछि मात्र उपलब्ध गराइने बताइएको छ ।

यो मोटरसाइकलमा २४९.६ सीसीको सिंगल सिलिन्डर, फोर स्ट्रोक इन्जिन छ, जसले ३२ एचपीको पावर दिन्छ । ६–स्पिड गियरबक्स भएको सो मोटरसाइकलको फ्रन्ट र रियरमा निसिन सिंगल डिस्क ब्रेक छ ।

३६१ एमएम ग्राउन्ड क्लियरेन्स भएको यो मोटरसाइकलको सिटको उचाई ९४० एमएम छ भने ६.५ लिटरको इन्धन ट्यांकी छ । यो मोटरसाइकल रेड र ब्ल्याक गरी दुई कलर अप्सनमा उपलब्ध हुनेछ ।

ईएफआई प्रविधियुक्त भएकाले यो मोटरसाइकलमा पहिले भन्दा बेटर कोल्ड स्टार्ट, बेटर थ्रोटल रेस्पोन्स, बेटर फ्युल एफिसियन्सी र लेस मेन्टिनेन्स जस्ता विशेषता छन् ।