अल्टो ८०० र क्विड लगायतका १७ कार अब उत्पादन नहुने

अब केही नयाँ ब्रान्ड र मोडलका कार खरिद गर्ने सोच बनाउनु भएको छ भने तपाईका लागि रोजाइको विकल्प साँघुरिने भएको छ । भारतमा लागू भएको नयाँ नियम अनुसार केही ब्रान्डका मोडल उपलब्ध हुने छैनन् । भारत र नेपालको बजार अधिकांश रुपमा उस्तै हुने र धेरै भारतीय कार नेपाली बजारमा समेत उपलब्ध हुने भएकाले यसको प्रत्यक्ष असर यहाँ पनि पर्ने गर्छ ।

हिजो अर्थात २०२३ अप्रिल १ देखि भारतीय कार बजारमा १७ कार डिस्कन्टिन्यु भएका छन् । यसको अर्थ ती १७ कार अब बजारमा उपलब्ध हुने छैनन् । यी मध्ये सबैभन्दा बढी होन्डाका ५, महिन्द्राका ३, हुन्डाई र स्कोडाका २/२, रनो, निसान, मारुती सुजुकी, टोयोटा र टाटाका १/१ कार सो सूचीमा सामेल छन् । यी मध्ये धेरै डिजेल कार छन् ।

भारतमा अप्रिल १ देखि रियल ड्राइभिङ इमिसन (आरडीई) नामक नयाँ इमिसन नर्म्स लागू भएको छ । यस अनुसार कार कम्पनीहरुले आफ्नो कारको इन्जिन अपडेट गर्नुपर्छ वा उत्पादन नै बन्द गर्नुपर्छ ।

यो नियम अनुसार होन्डा सिटी फोर्थ जेनेरेसन, होन्डा सिटी फिफ्थ जेनेरेसन डिजेल, होन्डा अमेज डिजेल, होन्डा ज्याज र होन्डा डब्ल्युआर–भीको उत्पादन बन्द हुनेछ ।

त्यसैगरी महिन्द्रा मराजो, महिन्द्रा अल्टुरस–जी४ र महिन्द्रा केयूभी १०० बन्द हुनेछन् । हुन्डाई भरना डिजेल, स्कोडा अक्टाभिया, स्कोडा सुपर्व, टाटा अल्ट्रोज डिजेल, रेनो क्विड ८००, निसान किक्स, मारुती अल्टो ८०० र टोयोटा इन्नोभा क्रिस्टा पेट्रोलको उत्पादन पनि बन्द हुनेछ ।

यस अनुसार नेपाली बजारमा समेत लोकप्रिय रहेका रेनो क्विड, मारुती अल्टो आदि इन्ट्री लेवलका कार अब उपलब्ध हुने छैनन् । अन्य मोडल पनि नेपाली बजारमा बिक्री भइरहेका छन् ।