रोयल इन्फिल्ड क्लासिक ३५० ब्ल्याक किन्दा १५ हजारको निःशुल्क एसेसरिज

रोयल इन्फिल्डको नेपालका लागि आधिकारिक वितरक अल्फा अटोमोटिभले नेपाली बजारमा उपलब्ध ब्ल्याक कलर भेरिएन्टको क्लासिक ३५० किन्दा १५ हजार रुपैयाँ बराबरको एसेसरिज निःशुल्क उपलब्ध गराउने भएको छ ।

नेपाली बजारमा उपलब्ध बीएस४ मापदण्डको क्लासिक ३५० मा ३४६ सीसीको सिंगल सिलिन्डर इन्जिन छ, जसले १९.८ बीएचपी पावर र २८ एनएम टर्क जेनेरेट गर्छ ।

अल्फा अटोमोटिभले आगामी दिनमा नेपालमै रोयल इन्फिल्डका बाइक एसेम्बल गर्ने तयारी गरिरहेको छ । रोयल इन्फिल्डका मोटरसाइकल नेपालमा उत्पादन गर्नका लागि टीजी अटो ग्रुप दर्ता भएको छ । बारा जिल्लाको जीतपुरसिमरा उपमहानगपालिका वडा नम्बर ९ मा स्थापना हुने गरी टीजी अटो ग्रुप प्रालिको दर्ता गत भदौँ २ गते भएको हो । यसका लागि ३८ करोड लगानी हुनेछ भने वार्षिक ८ हजार मोटरसाइकल उत्पादन गरिने छ । यसमा ६७ जनाले रोजगार पाउने छन् ।

हाल नेपाली बजारमा रोयल इन्फिल्ड क्लासिक ब्ल्याकको मूल्य ६ लाख ४० हजार रुपैयाँ छ । त्यसैगरी ब्याटल ग्रिन, गन मेटल ग्रे, रेडिच रेड र एस कलरको मूल्य ६ लाख ५० हजार रुपैयाँ छ ।