यी हुन् नेपाली बजारमा धेरैले रुचाउने ३ लाख हाराहारी मूल्यमा उपलब्ध १२५ सीसी स्कुटर

नेपाली बजारमा बिक्री हुने स्कुटर मध्ये १२५ सीसी सेगमेन्टका स्कुटर सबैभन्दा धेरैको रोजाइमा परेको पाइन्छ । पहिले ११० सीसी लोकप्रिय रहेकोमा पछिल्लो समयमा अलि बढी पावर चाहने ग्राहकको संख्या बढिरहेको र धेरै ब्रान्डले यही सेगमेन्टका स्कुटर बजारमा उपलब्ध गराएका कारण पनि यो सेगमेन्ट रुचाउनेहरु बढ्दै गएका हुन् ।

नेपाली बजारमा यो सेगमेन्टमा होन्डाले डियो र ग्राजिया स्कुटर उपलब्ध गराइरहेको छ । त्यसैगरी यामाहाको रे जेडआर १२५ स्ट्रिट -याली हाइब्रिड बीएस६, टीभीएस एनटर्क एक्सपी र सुजुकी एभेनिस छन् ।

यी वाहेक पछिल्लो समयमा नेपाली बजारमा अप्रिलिया एसआर १२५ र बेनेली प्यानेरिया १२५ जस्ता स्कुटर समेत उपलब्ध छन् ।

होन्डाले पहिले ११० सीसीमा उपलब्ध गराएको डियो निकै नै लोकप्रिय थियो । पछिल्लो समयमा यो १२५ सीसीमा समेत उपलब्ध हुन थालेको हो । होन्डा डियो हाल स्ट्यान्डर्ड र डिलक्स गरी दुई भेरिएन्टमा उपलब्ध छ । यसको मूल्य क्रमशः २ लाख ९९ हजार ९ सय र ३ लाख ९ हजार ९ सय रुपैयाँ छ ।

त्यसैगरी होन्डा ग्राजिया बीएस६ पनि दुई भेरिएन्टमा उपलब्ध छ । यसको मूूल्य २ लाख ८२ हजार ९ सय र ३ लाख २ हजार ९ सय रुपैयाँ छ ।

यामाहाको रे जेडआर १२५ स्ट्रिट -याली हाइब्रिड बीएस६ स्कुटर नेपालमै सबैभन्दा बढी माइलेज दिने स्कुटरको रुपमा कम्पनीले बताउने गरेको छ । हाइब्रिड प्रविधि र बीएस६ इन्जिन भएकाले यो नेपालमा उपलब्ध अन्य स्कुटरको तुुलनामा विशेष गुुणस्तरीय भएको बताइन्छ । यसको मूल्य ३ लाख १४ हजार ९ सय रुपैयाँ छ ।

टीभीएसले १२५ सीसीको एनटर्क स्कुटर विभिन्न भेरिएन्टमा उपलब्ध गराइरहेको छ । पछिल्लो समयमा नेपाली बजारमा भित्रिएको एनटर्क एक्सपीको मूूल्य ३ लाख २० हजार ९ सय रुपैयाँ छ । यो नयाँ मोडलमा टीभीएस स्मार्ट एक्सकनेक्ट कनेक्टिभिटी प्ल्याटफर्म, राइड मोडहरु छान्ने सुविधा हुनुको साथै हलुका वजन लगायतका विशेषता छन् ।

सुजुकी एभेनिस अर्को लोकप्रिय स्कुटर हो । आकर्षक डिजाइन तथा लुक्स र आधुनिक फिचर्सले सुसज्जित यो स्कुटर प्रिमियम सेग्मेन्टमा उत्कृष्ट रहेको कम्पनीको भनाइ छ । यसको मूल्य २ लाख ९९ हजार ९ सय रुपैयाँ छ ।

र्याप अराउन्ड एलईडी हेडल्याम्प, एलईडी टेलल्याम्प, लामो तथा ठूलो र आरामदायी सिट, यूएसबी चार्जिङ पोर्ट, एड्जस्टेबल रियर सस्पेन्सन, सीबीएसका साथ डिस्क ब्रेक र ७ लिटरको इन्धन ट्यांकी जस्ता विशेषता भएको अप्रिलिया एसआर १२५ को मूूल्य २ लाख ८८ हजार ९ सय रुपैयाँ छ ।

रेट्रो फिनिस सहितको प्रिमियम स्कुटर बेनेली प्यानेरिया १२५ को पहिचान अन्य स्कुटरको तुलनामा फरक छ । यसको मूल्य हाल नेपाली बजारमा २ लाख ९९ हजार ९ सय रुपैयाँ छ ।