होन्डा एलिभेट भोली नेपालमा लन्च हुँदै, यस्तो छ मूल्य र फिचर

काठमाडौं– होन्डा गाडीको नेपालका लागि आधिकारिक वितरक स्याकार ट्रेडिङ कम्पनीले भोली नयाँ एसयूभी एलिभेट लन्च गर्ने भएको छ । कम्पनीले यसअघि एलीभेटको मूल्य र नेपाली बजारमा उपलब्ध हुने भेरिएन्ट सार्वजनिक गरेको थियो । यो नयाँ एसयूभी ४ भेरिएन्टमा नेपाल आउन लागेको हो ।

एलीभेट म्यानुअल र सीभिटी दुवै ट्रान्समिसनमा उपलब्ध हुनेछ । जसमध्य एसभी, भी, भीएक्स, र जेडएक्स चारवटै भेरिएन्टमा म्यानुअल ट्रान्समिसन उपलब्ध हुनेछ । जसको मूल्य क्रमशः ५६ लाख ३५ हजार, ६० लाख ३५ हजार, ६६ लाख ९५ हजार र ७३ लाख ४४ हजार रुपैयाँ निर्धारण गरिएको छ ।

सिभिटीमा भने यसको भी, भीएक्स, र जेडएक्स भेरिएन्टमात्र उपलब्ध हुने कम्पनीले जनाएको छ । जसको मूल्य क्रमशः ६५ लाख ७० हजार, ७१ लाख ९५ हजार र ७८ लाख ७० हजार तोकिएको छ । जेडएक्स सीभिटी डुअल टोन विकल्पमा समेत उपलब्ध हुनेछ । जसको मूल्य ७९ लाख ४४ हजार निर्धारण गरिएको छ ।

हुन्डाई क्रेटा र किया सेल्टोस जस्ता यो सेग्मेन्टका चर्चित एसयूभीको प्रतिस्पर्धी वनेर आउन लागेको एलीभेटमा होन्डाले १.५ लिटर क्षमताको नेचुरल एस्पीरेटेड ईन्जिन दिएको छ । उक्त इन्जिनले अधिकतम १२१ हर्स पावर र १४५ एनएम टर्क जेनेरेट गर्छ ।

एलीभेटको एक्सटेरियरमा एलइडी डीआरएल सहितको फुल एलइडी प्रोजेक्टर हेडल्याम्प, एलइडी टर्न इन्डिकेटर तथा रियर एलइडी लाइट पाउन सकिन्छ । होन्डाले एलिभेटमा सिङ्गल प्यानल सनरुफ दिएको छ ।

यसैगरी इन्टेरियमा फराकिलो स्पेस, ठूलो साइजको हेड र लेग रुम, ७ इन्चको मल्टी इन्फर्मेसन डिस्प्ले र १०.२५ इन्चको हाइ डेफिनेसन फ्लोटिङ इन्फोटेन्मेन्ट डिस्प्ले पाउन सकिन्छ । आधुनिक स्टाइल र उत्कृष्ट पर्फमेन्स भएको यस एसयूभीले ग्राहकहरुलाई उच्चस्तरीय ड्राईभिङ्ग अनुभव दिने होन्डाले जनाएको छ ।

सुरक्षाका लागी यसमा होन्डा सेन्सिङ एडिएएस फिचर रहेको छ । साथै यसमा रियर पार्किङ सेन्सर, मल्टी एङ्गल रियर भ्यू क्यामेरा, हिल स्टार्ट एसिस्ट, लेनवाच क्यामेरा, आइएसओ फिक्स र ६ वटा एयरब्याग दिइएको छ ।