यामाहाले ल्यायो क्लच बिना गियर परिवर्तन गर्न सकिने नयाँ प्रविधि वाई-एएमटी

यामाहाले युरोपेली बजारमा बाइकका लागि नयाँ टेक्नोलोजी ल्याएको छ । कम्पनीले सो टेक्नोलोजीलाई वाई-एएमटी नाम दिएको छ । आगामी दिनमा कम्पनीले आफ्नो बाइकमा सो टेक्नोलोजी प्रयोग गर्नेछ । जसका कारण बाइक चलाउने अनुभवमा पूरै परिवर्तन हुने विश्वास गरिएको छ ।

वाई–एएमटी टेक्नोलोजीमा बाइक चलाउन क्लच र लिभरको आवश्यकता नपर्ने कम्पनीले जनाएको छ । सो टेक्नोलोजी बाइकको राइड बाइ वायर टेक्नोलोजीमा प्रयोग गरिनेछ । यसले क्लच थिचेर गियर परिवर्तन गर्नुपर्ने आवश्यकता हट्नेछ ।

यो नयाँ टेक्नोलोजीलाई स्विच गियर माउन्ट गरिएको प्यानलबाट सञ्चालन गर्न सकिनेछ, जसलाई हातको औँलाले सञ्चालन गर्न सकिनेछ । सो टेक्नोलोजी प्रयोग पछि उच्च गतिमा बाइक चलाउँदा पनि सजिलै र कम समयमा गियर परिवर्तन गर्न सकिनेछ । यो टेक्नोलोजीमा राइडरले आफैं गियर परिवर्तन गर्न सक्ने छन् वा बाइकले नै यो काम स्वतः गर्नेछ ।

यामाहाको वाई-एएमटी जस्तै अन्य केही कम्पनीले पनि यस्तै प्रविधि प्रयोग गरेका छन् । होन्डाले आफ्नो स्कुटर र बाइकमा डीसीटी टेक्नोलोजी प्रयोग गरेको छ । बीएमडब्ल्युले पनि आफ्नो बाइकमा एएसए टेक्नोलोजी प्रयोग गरेको छ । यामाहाले यसअघि आफ्नो बाइक एफजेआर १३०० मा पनि वाईसीसी-एस प्रयोग गरिसकेको छ ।