यामाहा आर१५ भी४ र एमटी १५ का नयाँ मोटोजीपी संस्करण सार्वजनिक, एफजेडमा पनि आकर्षक अपडेट

काठमाडौं–यामाहाले भारतीय बजारमा आफ्ना लोकप्रिय स्पोट्र्स मोटरसाइकल आर–१५ भी४ र एमटी–१५ भर्सन २.० को मोन्स्टर इनर्जी मोटोजीपी एडिशन पुनः सार्वजनिक गरेको छ । यसका साथै कम्पनीले एफजेड सिरिज अन्तर्गतका एफजेड–एस एफआई हाइब्रिड र एफजेड–एस एफआई स्ट्यान्डर्ड मोडलमा नयाँ कलर अप्सन पनि थपेको छ ।

यी नयाँ संस्करणको मुख्य आकर्षणका रुपमा यामाहाको फ्याक्ट्री रेसिङ मोटरसाइकलबाट प्रेरित रेसिङ शैलीको नयाँ डिजाइनलाई लिइएको छ । बाहिरी डिजाइन र आवरणबाहेक मोटरसाइकलको इन्जिन, च्यासिस तथा अन्य प्राविधिक फिचरहरू भने स्ट्यान्डर्ड मोडलसरह नै राखिएका छन् ।

एफजेड सिरिजतर्फ कम्पनीले एफजेड–एस एफआई हाइब्रिडमा नयाँ ‘आइस स्टर्म’ र एफजेड–एस एफआई स्ट्यान्डर्डमा ‘मेटालिक ब्ल्याक’ रङ उपलब्ध गराएको छ, जसले मोटरसाइकललाई थप स्पोर्टी र प्रिमियम लुक्स प्रदान गर्छ । यी मोडलहरूमा पनि कुनै मेकानिकल परिवर्तन गरिएको छैन ।

मूल्यका हिसाबले नयाँ आर–१५ भी४ मोन्स्टर इनर्जी मोटोजीपीको १ लाख ७६ हजार ५० भारु र एमटी–१५ भर्सन २.० मोटोजीपी संस्करणको १ लाख ७७ हजार २३० भारतीय रुपैयाँ तोकिएको छ ।