यामाहाले ल्याउदै छ आर२, दर्ता भयो ब्रान्ड नेम

यामाहाले बजारमा दुई नयाँ बाइक उपलब्ध गराउने तयारी गरिरहेको समाचार सार्वजनिक भएको छ । आर सिरिजको रुपमा बजारमा आउने ती बाइक मध्ये एक आर२ हुने अनुमान गरिएको छ ।

यामाहाले केही समय पहिले एफजेड–एक्स बाइक लन्च गरिसकेको छ । त्यसैगरी हालै आर२ नामको ट्रेडमार्क दर्ता गराएको छ । यसका आधारमा कम्पनीले २०० सीसी इन्जिनयुक्त नयाँ बाइक बजारमा ल्याउने तयारी गरिरहेको अनुमान गरिएको छ ।

यद्यपि कम्पनीले आधिकारिक रुपमा यसको जानकारी दिएको छैन । केही दिन पहिले देखि नै लगातार रुपमा विभिन्न टिजर तस्बिरहरु सार्वजनिक भइरहेका छन् र यसका आधारमा धेरैले त्यो बाइक आर१५ भी४ भएको हुन सक्ने अनुमान गरिरहेका थिए । तर अब भने यो बाइक आर२ हुन सक्ने अनुमान समेत हुन थालेको छ ।

हाल बजारमा टीभीएस अपाचे आरटीआर २०० ४भी, बजाज पल्सर एनएस२०० र होन्डा हर्नेट २.० जस्ता बाइकले राम्रो बजार लिइरहेको समयमा यामाहाको २०० सीसीको सो बाइक समेत आयो भने अर्को प्रतिस्पर्धि थपिने छ ।