यामाहाले भारतमा वाईजेडएफ-आर२ नाम दर्ता गर्‍यो, नयाँ सुपरस्पोर्ट बाइक आउने संकेत

यामाहाले भारतमा नयाँ सुपरस्पोर्ट मोटरसाइकल वाईजेडएफ-आर२ नाम ट्रेडमार्क आवेदन दिएको छ । सो सुपरस्पोर्ट बाइक लन्च भएमा यसलाई वाईजेडएफ-आर१५ र वाईजेडएफ-आर३ को बिचमा राखिनेछ ।

हाल भारतीय बजारमा यामाहाको सुपरस्पोर्ट लाइनअपमा स्पष्ट अन्तर देखिन्छ।  आर१५ बाइक १५५ सीसी इन्जिनसहित इन्ट्री–लेभल पर्फर्मेन्स बाइकका रूपमा स्थापित छ भने आर३ बाइक ३२१ सीसी ट्विन–सिलिन्डर इन्जिनसहित उच्च सेगमेन्टमा पर्छ । यस्तो अवस्थामा २०० सीसी भन्दा माथिको वाईजेडएफ-आर२ ले यी दुई मोडलबीचको दूरी भर्न सक्ने अपेक्षा गरिएको छ।

आर१५ यामाहाको सबैभन्दा बलियो मोडलमध्ये एक हो ।  सो बाइकमा १५५ सीसी लिक्विड कुल्ड सिंगल सिलिन्डर इन्जिन समावेश छ, जसले १८.४ पीएस पावर र १४.२ एनएम टर्क उत्पादन गर्छ । यसमा ६ स्पिड गियरबक्स समावेश छ । कम्पनीले प्रत्येक महिना औसत ८ हजारदेखि १० हजार युनिट आर१५ बिक्री गर्दै आएको छ। आर३ मा ३२१ सीसी लिक्विड कुल्ड समानान्तर ट्विन इन्जिन प्रयोग गरिएको छ, जसले ४२ पीएस पावर र २९.५ एनएम टर्क दिन्छ ।

यदि वाईजेडएफ-आर२ लन्च भयो भने, यसले केटीएम आरसी २०० जस्ता मोटरसाइकलसँग प्रतिस्पर्धा गर्ने अपेक्षा गरिएको छ । सुरुमा यामाहाले आर१५ सँगसँगै आर२ बिक्री गरी ग्राहकलाई थप विकल्प दिन सक्छ ।

हालका लागि यामाहाले वाईजेडएफ-आर२ बाइक ट्रेडमार्क दर्ताबाहेक कुनै आधिकारिक घोषणा गरेको छैन।