लाकुरी भञ्ज्याङको बाटोमा रे जेडआरले दियो ६१.४२ किमीको माइलेज, यसरी गरियो टेस्ट

काठमाडौं – यामाहाको नेपालका लागि आधिकारिक वितरक एमएडब्ल्यु इन्टरप्राइजेजले आयोजना गरेको माइलेज च्यालेन्जमा उज्वला घिमिरे विजेता बनेकी छन् । सो च्यालेन्जमा सुमन महर्जन फर्स्ट रनर अप र सुनिल लम्साल सेकेन्ड रनर अप बने ।

यामाहाको बल्खु सोरुमबाट प्रारम्भ भएको सो माइलेज च्यालेन्जमा यामाहाको रे जेडआर १२५ एफआई स्कुटरको माइलेज टेस्ट गरिएको थियो । लाकुरी भञ्ज्याङको देउराली माउन्टेन रिसोर्ट सम्म पुग्दा करिव १८ किलोमिटरको दूरी पार गरेका करिव ३० स्कुटरको माइलेज टेस्ट गरिएको थियो ।

माइलेज टेस्टमा उज्वला घिमिरेले चलाएको स्कुटरले ६१.४२ किलोमिटर, सुमन महर्जनले चलाएको स्कुटरले ५८.९६ किलोमिटर र सुनिल लम्सालले चलाएको स्कुटरले ५७.६० किलोमिटरको माइलेज दिएको थियो ।

यामाहाको यो स्कुटरले ५८ किलोमिटर प्रतिलिटरको माइलेज दिने कम्पनीले आधिकारिक रुपमा दाबी गर्दै आएको छ । तर परीक्षणमा यो भन्दा पनि धेरै माइलेज दिएको पाइएको छ । यद्यपि केही समय पहिले गरिएको माइलेज टेस्टमा यही स्कुटरले ८० किलोमिटर सम्मको माइलेज समेत दिएको कम्पनीको दाबी छ । सडकको अवस्था, चलाउने व्यक्तिको व्यवहार, सडकमा हुने जाम र यस्तै विभिन्न कारणले पनि माइलेजमा फरक पर्छ । सो स्कुटरले यति धेरै माइलेज दिन्छ भन्ने कुरामा कतिपय ग्राहकहरु नै विश्वस्त नहुने भएकाले त्यसलाई प्रमाणित गर्नका लागि माइलेज च्यालेन्जको आयोजना गरिने कम्पनीको भनाइ छ । यसबाट ग्राहकसँग नियमित सम्पर्क पनि हुने र उनीहरुलाई मनोरञ्जनात्मक कार्यक्रममार्फत कम्पनीसँग जोडिरहन पनि यसले सहयोग गर्छ ।

यसरी गरिन्छ माइलेज टेस्ट
यामाहाका विभिन्न स्थानमा रहेका सोरुममार्फत माइलेज टेस्ट गरिन्छ । यसका लागि सोरुमहरुले बिक्री गरेका स्कुटरका ग्राहकहरुलाई आमन्त्रण गर्छन् । त्यसपछि दर्ता प्रक्रिया प्रारम्भ हुन्छ । ग्राहकहरुले आफूले चलाइरहेको स्कुटर नै माइलेज च्यालेन्जका लागि उपयोग गर्छन् ।

अब माइलेज च्यालेन्जका लागि स्टार्ट गर्नु भन्दा पहिले सबै स्कुटरलाई एउटै लेवलमा राखेर ‘फ्युल टपअप’ गरिन्छ । यसको अर्थ सबै स्कुटरमा बराबर लेवलमा इन्धन राखिन्छ । त्यसपछि ट्रिप मिटरलाई शून्यमा राखिन्छ ।

स्कुटर स्टार्ट गरेर विभिन्न दूरी पार गर्दै गन्तव्यमा पुगे पछि अब स्कुटरको माइलेज जाँच गरिन्छ । यसका लागि सबै स्कुटरलाई एउटै खालको सतहमा राखिन्छ । त्यसपछि अब कति इन्धन खपत भयो भनी जाँच गरिन्छ । यसका लागि एउटा भाडोमा निश्चित परिमाणको इन्धन राखिन्छ र त्यसलाई इन्धन ट्यांकीमा कति परिमाणमा हाल्दा पहिलेको लेवलमा पुग्यो भनी नापेर हेरिन्छ । यसका आधारमा कति इन्धन खपत भयो भन्ने थाहा पाउन सकिन्छ । त्यसपछि स्कुटरले पार गरेको दूरी पनि मापन गरिन्छ ।

यसरी खपत भएको इन्धन र पार गरेको दूरीका आधारमा माइलेज थाहा हुन्छ । उदाहरणको लागि २० किलोमिटर गुडेको छ र २ सय एमएल इन्धन खपत भयो भने एमएललाई लिटरमा रुपान्तर गरी त्यसले पार गरेको किलोमिटरलाई भाग गर्नु पर्छ । यहाँ २ सय एमएललाई लिटरमा रुपान्तरण गर्दा ०.२ हुन्छ । यसका आधारमा २० लाई ०.२ ले भाग गर्दा १०० हुन्छ । यसका आधारमा १०० किलोमिटर माइलेज भयो ।

रे जेडआर नै रोज्नुको कारण
यो स्कुटरले भारतमा ‘स्कुटर अफ द इयर २०२१’ को अवार्ड पाएको हो । यामाहा रे जेडआर एफआई स्कुटर धेरै माइलेज दिने स्कुटरको रुपमा समेत परिचित छ । यसमा १२५ सीसीको बीएस ६ मापदण्डयुक्त यामाहाको प्याटेन्डेड ब्लुकोर एफआई प्रविधिसहितको इन्जिन रहेको जनाइएको छ । यसमा अंग्रेजी अक्षर ‘वाई’ आकारको एलइडी लाइट, नयाँ डिजिटल इन्स्ट्रुमेन्ट क्लस्टर, स्टप एन्ड स्टार्ट सिस्टम, क्वाइट स्टार्ट–अपका लागि स्मार्ट मोटर जेनेरेटर, साइड स्ट्यान्ड इन्जिन कट–अफ स्विच र युनिफाइड ब्रेकिङ सिस्टमजस्ता आधुनिक र सुविधाजनक फिचर रहेको कम्पनीले जनाएको छ ।

रे जेडआर एफआई प्रविधिको स्कुटर हो । यसमा सेन्सर र एक्चुएटर जोडिएको हुन्छ । सेन्सर र एक्चुएटरकै कारण यसले बढी माइलेज दिने यामाहा नेपालका सर्भिस इन्जिनियर सरोज घिमिरेले बताए । सेन्सर र एक्चुएटरले वातावरणमा भएका विभिन्न अवस्थालाई ईसीयूमा पठाइरहेको हुन्छ । ईसीयूले त्यही अनुसार कति मात्रामा इन्धन पठाउने भनी निर्धारण गर्छ र आवश्यक मात्रामा मात्र इन्धन पठाउँछ । यसले गर्दा नै एफआई इन्जिनयुक्त मोटरसाइकल वा स्कुटरले धेरै माइलेज दिन्छ । कार्बुरेटर इन्जिनमा भने थ्रोटलको मात्रा अनुसार जति पनि इन्धन पठाउने गरिन्छ ।

त्यसैगरी यसमा भएको थ्रीएस स्विचले पनि माइलेज धेरै दिनमा भूमिका खेलेको हुन्छ । जाम भएको वा अन्य अवस्थामा यसको स्टार्ट आफै नै बन्द हुन्छ । ५ सेकेन्ड भन्दा बढी समय सम्म रोकियो भने यसमा भएको भल्वले थाहा पाउछ र इन्जिनमा पावर सप्लाई कट अफ हुन्छ । फेरि स्टार्ट गर्नु प¥यो भने थ्रोटल भल्वको प्रयोग गर्न सकिन्छ । यो बीचमा इन्जिन बन्द हुँदा पनि माइलेज बढाउनमा भूमिका खेल्छ ।

विद्युतीय स्कुटरको विकल्पमा प्रयोग गर्न सकिने
पछिल्लो समयमा नेपाली बजारमा इन्धनको मूल्य बढ्दै गएको छ । यो अवस्थामा धेरै स्कुटर प्रेमीहरुको ध्यान इलेक्ट्रिक स्कुटरतिर पनि जान थालेको छ । तर यति धेरै माइलेज दिने स्कुटर पाए पछि अन्य इलेक्ट्रिक स्कुटरको खोजी गर्नु नपर्ने यामाहाको आधिकारिक वितरक एमएडब्ल्यु इन्टरप्राइजेजले बताएको छ । यसका लागि यामाहा रे जेडआर १२५ एफआई मुख्य विकल्प भएको कम्पनीको भनाइ छ । हाल नेपाली बजारमा यामाहा रे जेडआर विभिन्न तीन भेरिएन्टमा उपलब्ध छ । रे जेडआर ड्रमको मूल्य २ लाख ४९ हजार ९ सय, डिस्कको मूल्य २ लाख ६५ हजार ९ सय र एसआरको मूल्य २ लाख ७५ हजार ९ सय रुपैयाँ छ ।

माइलेज च्यालेन्जको निरन्तरता
यामाहाले काठमाडौं उपत्यकाका साथै उपत्यका वाहिरका विभिन्न स्थानमा समय समयमा यस्ता माइलेज च्यालेन्जको आयोजना गर्दै आएको छ । यसरी च्यालेन्जमा सहभागी राइडरहरुलाई निश्चित गन्तव्यमा पु¥याई विभिन्न मनोरञ्जनात्मक कार्यक्रममा सहभागी गराउने गरेको छ । विजेताहरुलाई पुरस्कृत गर्नुका साथै सबै सहभागीहरुलाई गिफ्ट ह्याम्पर समेत दिने गरेको यामाहा नेपालले बताएको छ ।