३ बर्षभित्र बजार हिस्सा दोब्बरले बृद्धि गर्ने यामाहाको योजना

यामाहा मोटर्स इण्डियाले सन् २०२५ सम्ममा भारतीय बजारमा आफ्नो हिस्सालाई दोब्बरले बृद्धि गर्ने योजना बनाएको छ । जसका लागी उसले आगामी दिनहरुमा १२५ देखी १५० सिसी क्षमतासम्मका स्कुटर र १५० देखी २५० सिसी क्षमतासम्मका नयाँ प्रबिधीमा आधारित मोटरसाइकलको उत्पादनमा बढी जोड दिने बताएको छ ।

कम्पनीका चेयरम्यान इसिन चिहानाका अनुसार उक्त योजना पुरा गर्न कम्पनीले उत्पादन क्षमतामा बृद्धि गर्दै जानेछ । ‘उत्पादनमा समस्या आउन नदिनका लागी हामीले अहिले महंगो मूल्य तिरेरै भएपनि सेमिकन्डक्टर खरिद गरिरहेका छौ । यसले हाम्रा डिलरहरुलाई मोटरसाइकल र स्कुटरको अभाव हुन दिने छैन’ उनले भने ।

यामाहाले अघिल्लो बर्ष कुल ५ लाख २२ हजार युनिट मोटरसाइकल र स्कुटर बिक्री गर्दै जम्मा ३.६ प्रतिशत बजार हिस्सा कायम गरेको थियो । जापनिज अटोमेकर यो कम्पनीले ‘मास प्रोडक्सन’ भन्दा माथी राखेर प्रिमियम रेन्जका प्रोडक्टमा फोकस हुने कारण हिरो, टिभिएस, बजाज र होन्डा भन्दा आफू अलग्गै रहेको दाबी गर्दै आइरहेको छ । इलेक्ट्रिक टु ह्विलरका बिषयमा समेत आफूहरुले सम्भाव्यता अध्यायन गरिरहेको चिहानाले बताए ।

यामाहाले पछिल्लो सयम लन्च गरेको चौथो जेनेरेशन आर१५ र एरोक्स १५५ सहित फेसिनो र रे जेडआर को हाइब्रिड भर्सन अहिले भारतीय बजारमा सफल भैरहेको छ । साथै उसले अबको केही समयभित्रै एमटी १५ को अपडेटेड भर्सन र नयाँ मोटरसाइकल एक्सएसआर १५५ लन्च गर्ने तयारी गरिरहेको छ ।