यामाहाले दियो नेपाल प्रहरीलाई दुई मोटरसाइकल

काठमाडौं – यामाहाको नेपालका लागि आधिकारिक वितरक एमएडब्लु इन्टरप्राइजेज प्रालिले यामाहा एफजेड–२५ र सलुटो नामका दुईवटा मोटरसाइकलहरू नेपाल प्रहरीलाई प्रदान गरेको छ ।

कालिमाटी प्रहरी बिटमा सम्पन्न हस्तान्तरण समारोहमा यामाहाका प्रमुख व्यवस्थापकिय अधिकृत राजु क्षेत्री, नेपाल प्रहरीका वरिष्ठ प्रहरी उपरिक्षक अशोक सिंह र प्रहरी उपरिक्षक अपिल राज बोहराको उपस्थिति थियो । शान्तिपूर्ण गस्तीका निम्ति नेपाल प्रहरीले यी मोटरसाइकलको प्रयोग गर्नेछ ।

“सामाजिक कार्यहरूमा सामेल हुन र राष्ट्रको सुरक्षाबललाई सहयोग गर्न पाउनु सदैव अहोभाग्यको कुरा हो“, यामाहाका प्रमुख व्यवस्थापकिय अधिकृत राजु क्षेत्रीले भने ।

एमएडब्लुले व्यावसायिक सामाजिक उत्तरदायित्व अन्तर्गत यस्ता कार्यहरु गर्दै आएको बताएको छ । एमएडब्लुले लामो समयदेखि शान्तिपूर्ण गस्तीमा सहयोगी हुने र शहरको शान्ति र सुरक्षाको प्रयोजनका निम्ति नेपाल प्रहरी तथा ट्राफिकलाई यामाहाका मोटरसाइकल प्रदान गर्दै आइरहेको छ ।