यामाहाले थाल्यो नेपालमै एसेम्बल, परीक्षणका लागि एफजेड भीथ्रीको उत्पादन शुरु

जापनिज टु ह्विलर ब्रान्ड यामाहाले नेपालमै मोटरसाइकल र स्कुटरको एसेम्बल शुरु गरेको छ । यामाहा ब्रान्डलाई एसेम्बल गर्न आधिकारिक वितरक एमएडब्लु ग्रुपले दुई वर्षअघि एमएडब्लु अटो प्रालि कम्पनी दर्ता गरेको थियो । सोही कम्पनीले भैरहवामा स्थापना भएको प्लान्टबाट पहिलो चरणमा परीक्षणका लागि भनेर एफजेड भीथ्री मोटरसाइकल एसेम्बल शुरु गरेको कम्पनी स्रोतले वताएको छ ।

कम्पनी स्रोतका अनुसार प्लान्टबाट पूर्ण क्षमतामा मोटरसाइकल र स्कुटर उत्पादन हुन भने केही समय लाग्नेछ । ‘तत्कालका लागि हामीले एउटामात्र मोडल परीक्षणका लागि भनेर उत्पादन गरेका हौ । विस्तारै अन्य मोडलको उत्पादन पनि शुरु हुनेछ’ स्रोतले जनाएको छ ।

एमएडब्लु ग्रुपले यामाहा ब्रान्डका मोटरसाइकल तथा स्कुटर एसेम्बलका लागि एक अर्ब ५१ करोड ५० लाख बढीको लगानी गरेको छ । उक्त उद्योगबाट वार्षिक ३१ हजार मोटरसाइकल र १९ हजार स्कुटर उत्पादन हुने जनाइएको छ ।

सरकारले आर्थिक वर्ष २०७८÷७९ मा ल्याएको प्रतिस्थापन विधेयकमार्फत स्वदेशमा एसेम्बल उद्योग स्थापना गरी सवारी साधन उत्पादन गर्ने कम्पनीलाई विभिन्न छुट र सहुलियत दिएपछि टीभीएस र रोयल इन्फिल्डले उद्योग स्थापना गरी एसेम्बल शुरु गरेका थिए । बजाजले भने सो विधेयक आउनु अगावै एसेम्बल गर्दै आएको थियो ।

नेपालमा बिक्री हुने अन्य ठूला टु ह्विलर ब्रान्ड होन्डा, हिरो र सुजुकीले पनि एसेम्बल उद्योग लगाएर उत्पादन गर्ने योजना बनाएका छन् । जसमध्ये हिरोको प्लान्ट तयार भइसके पनि उत्पादक कम्पनी हिरो मोटोकर्पसँगको विवादका कारण आधिकारिक वितरक नेपाल जनरल मार्केटिङ प्रालिले बाइक एसेम्बल गर्न सकिरहेको छैन ।

सरकारले एसेम्बलमा प्रयोग हुने कम्पोनेन्टको आयातमा लाग्ने अन्तःशुल्कमा ५० प्रतिशत छुट र अन्य विभिन्न सहुलियत दिएपछि पछिल्लो समय विभिन्न टु ह्विलर व्रान्डमाझ स्वदेशमै एसेम्बल गर्ने लहर चलेको छ ।