याडियाको सस्तो स्कुटर आउँदै, १० हजारमा वुकिङ गर्न सकिने

याडिया स्कुटरको नेपालका लागि आधिकारिक वितरक कुजु नेपाल प्रालिले सस्तो मूल्यमा नयाँ स्कुटर ल्याउने भएको छ । यसअघि लिथियम आयोन व्याट्री जडित स्कुटर बिक्री गर्दै आएको कम्पनीले ग्राफिनी व्याट्री जडान भएको एम ६ ल्याउन लागेको हो । सो व्याट्रीको मूल्य कम पर्ने कारण स्कुटरको मूल्य पनि सस्तो पर्न गएको कम्पनीले जनाएको छ । नयाँ स्कुटरलाई ग्राहकले १० हजार रुपैयाँ भुक्तानी गरेर वुकिङ गर्न सक्नेछन् ।

१ लाख ७५ हजार रुपैयाँ मूल्य निर्धारण गरिएको सो स्कुटरमा १.२ किलोवाट क्षमताको मोटर जडान गरिएको छ । साथै यसमा ८०० लाइफ साइकल भएको ७२ भोल्ट ३६ एम्पियर आवरको व्याट्री दिइएको छ । ८ घन्टामा फुल चार्ज गर्न सकिने सो व्याट्रीले सिंगल चार्जमा ९० किलोमिटर रेन्ज दिने दावी गरिएको छ ।

सो स्कुटरमा जडित ब्याट्रीमा कम्पनीले २ वर्ष अर्थात २० हजार किलोमिटरसम्मको वारेन्टि दिने जनाएको छ । स्कुटरको अगाडी चक्कामा डिस्क र पछाडी ड्रम ब्रेक दिइएको छ भने सुरक्षाका लागी यसमा कम्वाइन व्रेकिङ सिस्टम पाउन सकिन्छ ।

कुजु नेपालले हाल याडियाका सी१ एस, एस–लाइक, जी५ र ई८एस प्रो स्कुटर उपलब्ध गराउँदै आएको छ । यी स्कुटरको मूल्य क्रमश ३ लाख ७० हजार, २ लाख ५५ हजार, ३ लाख ५० हजार र २ लाख ३० हजार रुपैयाँ निर्धारण गरिएको छ ।