२०२६ मा पाँच लाख ५० हजार गाडी बिक्री गर्ने साओमीको योजना

चिनियाँ ईभी निर्माता साओमीले विद्युतीय सवारी बजारमा आफ्नो उपस्थिति तीव्र रूपमा विस्तार गर्ने घोषणा गरेको छ । साओमीका प्रमुख कार्यकारी अधिकृत (सीईओ) लेई जुनले हालै एक लाइभ स्ट्रिममार्फत सन् २०२६ सम्ममा पाँच लाख ५० हजार युनिट ईभी बिक्री गर्ने महत्त्वाकांक्षी लक्ष्य प्रस्तुत गरेका हुन् ।

यो लक्ष्य सन् २०२५ को तुलनामा करिब ३४ प्रतिशतको वृद्धि हो । सन् २०२५ का लागि कम्पनीले सुरुमा तीन लाख ५० हजार गाडी बिक्री गर्ने लक्ष्य राखे पनि डिसेम्बरको सुरुमै उक्त लक्ष्य पूरा भएको थियो । सन् २०२५ को अन्त्यसम्ममा साओमीले चार लाख १० हजारभन्दा बढी युनिट गाडीहरू ग्राहकलाई हस्तान्तरण गरिसकेको छ ।

२०२१ बाट औपचारिक रूपमा अटोमोबाइल क्षेत्रमा प्रवेश गरेको साओमीले टेस्ला र अन्य स्थापित चिनियाँ ब्रान्डहरूको कडा प्रतिस्पर्धाका बाबजुद आफूलाई बलियो प्रतिस्पर्धीका रूपमा उभ्याउन खोजेको छ । धेरै विश्लेषकहरूले साओमीको अटो बजारमा प्रवेश ढिलो भएको टिप्पणी गरे पनि कम्पनीले तीव्र गतिमा प्रगति गरिरहेको छ ।

सन् २०२६ को पाँच लाख ५० हजारको लक्ष्य भेट्टाउन साओमीले चार नयाँ मोडेलहरू बजारमा ल्याउने तयारी गरेको छ । कम्पनीको हालको सफलताको मुख्य आधार ‘एसयू७’ सेडान र ‘वाईयू७’ एसयूभी रहेका छन् ।