जिकरको नयाँ ईभीमा गोल्डन ब्याट्री, ९ मिनेटमै १० देखी ८० प्रतिशतसम्म चार्ज

काठमाडौं– जिकरले आफ्नो नयाँ बिद्युतिय एसयुभी ७ एक्समा गोल्डन ब्याट्री जडान गरेको छ । विश्वकै सबैभन्दा छिटो चार्ज हुने दाबी गरिएको उक्त नयाँ प्रबिधीयुक्त ब्याट्रीलाई ९ मिनेट ४५ सेकेन्डमै १० देखी ८० प्रतिशतसम्म चार्ज गर्न सकिन्छ ।

सो नयाँ कारमा जिकरले ७५ किलोवाट आवर क्षमताको लिथियम आयोन फस्फेट(एलएफपी) ब्याट्री दिएको हो । उक्त ब्याट्रीलाई १९ मिनेटमै फुल चार्ज गर्न सकिन्छ । एकपटक फुल चार्ज गरेपछि यसले ५०० किलोमिटर रेन्ज दिने दाबी गरिएको छ ।

जिकरले ल्याएको गोल्डन ब्याट्रीको अर्को विशेषता भनेको यसलाई एक मिनेट चार्ज गरेपछि २१ माइल यात्रा गर्न सकिन्छ । जुन, हाल प्रचलनमा रहेका अन्य ब्याट्रीले दिन नसक्ने जनाइएको छ ।

८०० भोल्ट आर्किटेक्चरमा तयार पारिएको जिकर ७–एक्समा १५.०५ इन्चको फ्लोटिङ इन्फोटेन्मेन्ट सिस्टम र १३.०२ इन्चको इन्ट्रुमेन्ट क्लष्टर दिएको छ । पछाडिको प्यासेन्जरको लागि पनि १३ इन्चको छुट्टै स्कृन उपलब्ध छ ।