असोज २९ मा महिला मोटर -याली हुने

काठमाडौं – नेपाली मोटर स्पोर्ट्सको क्षेत्रमा मात्र नभै विश्वको अटोमोबाइल क्षेत्रकै इतिहासमा लोकप्रिय महिला मोटर -याली यसपटक Power to  Power Steering को नयाँ ब्राण्डमा हुने भएको छ । नेपाल अटोमोबाइल्स एसोसिएसन (नासा नेपाल) ले वुमन इमपावरमेन्ट थ्रु मोटरिङ थिममा सो -याली आगामी १५ अक्टोबर अर्थात असोज २९ मा गर्ने बताएको छ । भृकुटी मण्डपस्थित नेपाल पर्यटन बोर्डबाट शुरु भई सो -याली धुलिखेलमा समापन हुनेछ ।

-यालीमा तोकिएको स्थानमा पुग्न सहभागीले ४ वटा चेक प्वाइन्ट पार गर्नेछन्, जुन अत्यन्तै रोमान्चक हुनेछ । टीडीएस अर्थात समय, दुरी र गति सिष्टममा आयोजना गरिने -यालीका सहभागीले धुलिखेलको हिमालयन मोटरल्यान्डमा -यालीक्रस जस्तो अत्यन्तै रोमान्चक मोटर स्पोर्ट्सको अवसर समेत प्राप्त गर्नेछन् । त्यसैगरी भिन्टेज गाडीको सहभागिता अर्को महत्वपूर्ण पक्ष हुनेछ ।

सो इभेन्टमा बढीमा ५० वटा टिम समावेश गर्न सकिने नासा नेपालले बताएको छ । उक्त -यालीमा ख्याती प्राप्त कलाकार, खेलाडी तथा विशिष्ट व्यक्तित्वहरुको समेत सहभागिताको पहल भइरहेको बताइएको छ ।

-यालीमा सबै प्रकारका कार, जिप र भ्यान समेत सहभागी हुनसक्ने छन् । टिम दर्ता गर्दा प्रत्येक टिमको जम्मा ५ हजार र थप सहभागीको लागि २ हजार रुपैयाँ रजिष्ट्रेशन शुल्क लाग्ने छ ।

इभेन्टका सम्पुर्ण सहभागीहरुलाई सेफ ड्राइभिङको तालीम दिइनेछ भने भिन्टेज विधामा छुट्टै अवार्डिङ्ग गरिनेछ । -याली व्यवस्थापनको लागी ट्विङकल न्याँछोँको संयोजकत्वमा समिति गठन गरिएको बताइएको छ ।

सो -यालीमा विजयहरुलाई शिल्ड, मेडल र सर्टिफिकेट तथा आकर्षक गिफ्ट हयाम्पर र अन्तराष्ट्रिय सहभागिताको अवसर पनि दिइनेछ ।