आगामी दशकमा कुन इन्धन सबैभन्दा राम्रो विकल्प हुन सक्छ ?

पछिल्ला केही वर्षयता अटोमोबाइल उद्योगमा द्रुत परिवर्तन भइरहेको छ। एकातिर विद्युतीय सवारी साधनको प्रवर्द्धन भइरहेको छ भने अर्कोतर्फ पेट्रोलमा इथेनोल जस्ता जैविक इन्धन मिश्रण गर्दै प्रदूषण घटाउने प्रयास भइरहेको छ। साथै हाइड्रोजन जस्ता स्वच्छ इन्धनका विकल्पमा पनि अनुसन्धान सुरु भइसकेको छ। आगामी १० वर्ष भित्र पेट्रोल, डिजेल, सीएनजी, इलेक्ट्रिक र हाइब्रिडमध्ये कुन विकल्प सुरक्षित हुन्छ भन्ने बहस पनि भइरहेको छ ।

पेट्रोल कार अझै पनि सबैभन्दा सजिलै उपलब्ध हुने विकल्प मानिन्छ। तिनको सुरुवाती मूल्य कम हुन्छ र पेट्रोल पम्प जताततै पाइने हुँदा प्रयोगकर्तालाई सहज हुन्छ। तर पेट्रोलमा इथेनोलको मात्रा बढ्दै जाँदा पुराना मोडलको माइलेज घट्न सक्ने सम्भावना प्रबल छ।

डिजेल कार परम्परागत रूपमा उच्च टर्क र राम्रो माइलेजका लागि लोकप्रिय भए पनि कडा उत्सर्जन नियमको कारण धेरै सहरमा तिनको बिक्री घटेको छ। ग्रामीण क्षेत्र वा व्यावसायिक प्रयोगका लागि भने अझै पनि यो व्यवहारिक विकल्प हुन सक्छ।

विद्युतीय सवारी साधन हाल तीव्र गतिमा लोकप्रिय बन्दै गएको छ । कम चल्ने लागत, न्यून मर्मतसम्भार र सरकारी सहुलियतले तिनलाई भविष्यको मुख्य विकल्प बनाइरहेको छ। यद्यपि, चार्जिङ पूर्वाधारको कमी र सुरुवाती उच्च मूल्य यसको चुनौती बनेको छ। लामो यात्रामा असुविधा भए पनि शहरमा दैनिक प्रयोगका लागि विद्युतीय सवारी उपयुक्त  मानिन्छ।

सीएनजी कार पनि किफायती र वातावरणमैत्री विकल्पको रूपमा अघि बढिरहेको छ । यद्यपि, बुट स्पेस घट्नु र पावर कम हुनु यसको कमजोरी हुन् । धेरै शहरमा व्यावसायिक सवारी साधन समेत सीएनजीमा चलिरहेको छ ।

हाइब्रिड कार पेट्रोल र इलेक्ट्रिकबीचको संयोजनका कारण बढी माइलेज दिने र प्रदूषण घटाउने विकल्पका रूपमा लोकप्रिय हुँदैछ । यद्यपि, उच्च मूल्यका कारण सामान्य ग्राहकलाई महँगो पर्छ। सो कार इलेक्ट्रिक कारजस्तै नभए पनि उत्सर्जन मापदण्डमा यी कार प्रभावित नहुने सम्भावना भएकाले निकट भविष्यमा सुरक्षित विकल्प बन्न सक्छ।

आगामी दशकमा विद्युतीय र हाइब्रिड कार भविष्यमा सबैभन्दा राम्रो विकल्प हुन सक्ने संकेत प्रबल देखिन्छ । पेट्रोल, डिजेल र सीएनजी अस्तित्वमा भएता पनि उत्सर्जन नियम र इन्धन मिश्रणका कारण तिनको प्रयोगमा चुनौती बढ्दै जानेछ।