भारतमा हालै सार्बजनिक भएका यी ४ कार, माग बढी भएका कारण नेपाल आउन ढिलाई हुने

भारतीय बजारमा हालै सार्बजनिक भएका ४ भिन्न ब्रान्डका बहुप्रतिक्षत कारहरु माग बमोजिम आपूर्ती हुन सकिरहेका छैनन् । जसका कारण यी गाडीलाई हात पार्न भारतमै १ बर्षसम्म कुर्नुपर्ने देखिएको छ । भारतीय बजारमै अभाब झेलिरहेको महिन्द्रा एक्सयुभी ७००, टाटा पन्च, एमजी एस्टर र मारुती सुजुकीको नयाँ जेनेरशेन सेलेरियो हात पार्न लामै समय कुर्नु पर्ने देखिएको हो ।

२ महिना अघि सार्बजनिक गरिएको महिन्द्रा एक्युभी ७०० हात पार्न भारतमै ग्राहकले १ बर्षसम्म कुर्नुपर्ने देखिएको छ । अत्याधिक माग भएको यो एसयुभीको बुकिङ अझैपनि ७५ हजार माथी रहेको छ । त्यसैगरी टाटा मोटर्सले २ महिना अघि लन्च गरेको माइक्रो एसयुभी पन्चको माग समेत अत्याधिक मात्रामा बढिरहेको छ । यो एसयुभी हात पार्न ग्राहकले ८ महिनासम्म कुर्नुपर्ने देखिएको छ ।

एमजी मोटर्सले लन्च गरेको एस्टर सब फोर मिटर एसयुभी एस्टर समेत अत्याधिक माग गरिएको एसयुभी हो । कम मूल्यमा फिचर्स लोडेड बिशेषताका कारण यो एसयुभीको माग बढिरहेको छ । २ महिना अघि लन्च गरिएको यो एसयुभी हात पार्न ग्राहकले ४ महिनासम्म कुर्नुपर्ने देखिएको छ ।

मारुती सुजुकीले अघिल्लो महिनामात्र लन्च गरेको नयाँ जेनेरेशन सेलेरियोको माग समेत अहिले उच्च गतिमा बढिरहेको छ । सबैभन्दा बढी माइलेज प्रदान गर्ने दाबी गरिएको यो ह्याचब्याकलाई हात पार्न ग्राहकले ३ महिनासम्म कुर्नुपर्ने देखिएको छ ।

भारतीय बजारमा हालसालै लन्च गरिएका यी कारको माग अन्तरिक बजरमै उच्च रहेका कारण नेपाल भित्रिन केही समय लाग्ने देखिन्छ । सोही कारण पनि हालसम्म नेपालस्थित आधिकारिक बिक्रेताहरुले यी कारलाई नेपाल भित्राउने मित तय गर्न सकिरहेका छैनन् ।