भल्वोको दोस्रो इलेक्ट्रिक कार सी४० रिचार्ज सार्वजनिक, ५३० किमी रेन्ज

भल्वो सी४० रिचार्ज ईभी आधिकारिक रूपमा भारतमा सार्वजनिक गरिएको छ । जुलाई २०२२ मा ल्याइएको एक्ससी४० रिचार्ज पछि भारतीय बजारमा यो कम्पनीको दोस्रो इलेक्ट्रिक कार हो ।

भल्वो सी४० रिचार्ज ईभीको मूल्य अगस्तमा सार्वजनिक गरिने छ र यो एक्ससी४० भन्दा महँगो हुने अनुमान छ । सो इलेक्ट्रिक कारको बुकिङ पनि सोही समयमा सुरु हुनेछ । यसको बुकिङ वेबसाइट मार्फत लिइनेछ । सो ईभीको डेलिभरी सेप्टेम्बरबाट सुरु हुने अपेक्षा गरिएको छ ।

सो इलेक्ट्रिक कारमा एलईडी हेडलाइट, भर्टिकल एलईडी टेललाइट र रेडिएटर ग्रिलको सट्टा क्लोज्ड प्यानल दिइएको छ । भल्वो सी४० मा स्लोपिङ रूफलाइन समावेश छ जसले यसलाई एक्ससी४० रिचार्ज भन्दा फरक देखाइएको छ ।

भल्वो सी४० मा कम्पनीले ७८ किलोवाट क्षमताको ब्याट्री दिएको छ । यो ब्याट्री ८० प्रतिशत चार्ज हुन ३३ मिनेट मात्र लाग्छ । साथै यसमा दिइएका मोटरमा १५० किलोवाट क्षमताका २ वटा मोटरहरु छन् । यस मोटरबाट एसयूभीले ४०२ बीएचपी पावर र ६६० एनएम टर्क जेनेरेट गर्छ । यो एसयूभी फुल चार्जमा ५३० किलोमिटरसम्म चल्न सक्छ । यसको उच्च गति १८० किमी प्रतिघन्टा छ ।

सी४० रिचार्जमा ९.० इन्चको टचस्क्रिन इन्फोटेनमेन्ट सिस्टम, फुल्ली डिजिटल इन्स्ट्रयुमेन्ट क्लस्टर, प्यानोरामिक सनरुफ जस्ता फिचर दिइएको छ । भल्वो सी४० रिचार्जले भारतमा मर्सिडिज बेन्ज ईक्युबी, बीएमडब्ल्यु आई४, हुन्डाई आयोनिक ५ सँग प्रतिस्पर्धा गर्नेछ ।

भल्वो सी४० रिचार्जमा फ्रन्ट, कर्टेन, साइड र ड्राइभर नी एयरब्याग, ईबीडीको साथमा एबीएस, ब्रेक असिस्ट, एडीएएस र ३६० डिग्री क्यामेराको साथमा हिल स्टार्ट असिस्ट टेक्नोलोजी जस्ता सेफ्टी फिचर प्रदान गरिएको छ ।