भारतमा हिरोको भिडा भी१ इलेक्ट्रिक स्कुटरको डेलिभरी सुरु, नेपालमा प्रतीक्षा

हिरो मोटोकर्पले भिडा इलेक्ट्रिक स्कुटरको डेलिभरी सुरु गरेको छ । कम्पनीले आफ्नो पहिलो स्कुटर बैंगलोरमा डेलिभरी गरेको हो । भिडा भी१ ले भारतीय बजारमा एथर ४५०एक्स, टीभीएस आईक्युब, ओला एस१ प्रो र बजाज चेतक जस्ता प्रिमियम इलेक्ट्रिक स्कुटरसँग प्रतिस्पर्धा गर्नेछ ।

भिडा भी१ लाई २ भेरिएन्ट भी१ प्रो १ लाख ५९ हजार र भी१ प्लस १ लाख ४५ हजार भारुमा लन्च गरिएको छ । कम्पनीले भिडा भी१ प्लसमा ३.९ केडब्ल्युएचको ब्याट्री प्रयोग गरेको छ, जसले फुल चार्जमा १४३ किलोमिटरको रेन्ज दिन्छ । भिडा भी१ प्रोमा ३.९४ केडब्ल्युएच लिथियम–आयोन ब्याट्री प्रयोग गरेको छ, जसले फुल चार्जमा १६५ किलोमिटरको रेन्ज दिन्छ । सो स्कुटरको टप स्पिड ८० किमी प्रतिघन्टा छ ।

भिडा भी१ स्कुटरलाई एक मिनेट मात्र चार्ज गर्दा पनि १.२ किलोमिटरको रेन्ज दिन्छ । भिडा भी१ प्रोलाई ० देखि ८० प्रतिशत चार्ज हुन ५ घन्टा ५५ मिनेट र भिडा भी१ प्लसलाई ५ घन्टा १५ मिनेटको समय लाग्छ ।

सो इलेक्ट्रिक स्कुटरको ब्याट्री निकालेर पनि चार्ज गर्न सकिन्छ । भिडा भी१मा टीएफटी डिस्प्लेको साथमा ब्लुटुथ र स्मार्टफोन कनेक्टिभिटी जस्ता फिचर समावेश छ ।

भिडा भी१मा मोबाइल एप मार्फत सुविधा अनुसार राइड मोड पनि कस्टमाइज गर्न सकिन्छ । यसमा २६ लिटर स्टोरेज स्पेस पनि दिइएको छ । स्कुटरमा सेफ्टीका लागि ट्रयाकिङ फंक्शन, रिमोट लकिङ/अनलकिङ, सिंगल डिस्क ब्रेक र इमरजेन्सी अलर्ट बटन र क्रुज कन्ट्रोल जस्ता फिचर पनि उपलब्ध छ ।

नेपाली बजारमा पनि हिरोको इलेक्ट्रिक स्कुटर ल्याउने तयारी भइरहेको छ । नेपालका लागि आधिकारिक वितरक नेपाल जनरल मार्केटिङले भविष्यमा सो स्कुटर ल्याउने तयारी भइरहेको बताएको छ ।