हिरो मोटोकर्पले भिडा ब्रान्डमा नयाँ इलेक्ट्रिक सवारी ल्याउने

हिरोले केही महिना अघि पहिलो इलेक्ट्रिक सवारी साधन आगामी मार्च २०२२ सम्ममा बजारमा ल्याउनका लागि तयार भइरहेको बताएको थियो । यसै सन्दर्भमा केही दिन अघि हिरो मोटोकर्पले भिडा नामको ट्रेडमार्क दर्ता गरेको थियो । यसका आधारमा आगामी दिनमा हिरोले ‘भिडा’ नामक नयाँ ब्रान्डमा इलेक्ट्रिक सवारी साधन ल्याउने अनुमान गरिएको छ ।

कम्पनीले भिडा इलेक्ट्रिक, भिडा मोबिलिटी, भिडा ईभी, भिडा मोटोकर्प, भिडा स्कुटर र भिडा मोटरसाइकल जस्ता नामका लागि ट्रेडमार्क दाखिला दिएको थियो । मिडिया रिपोर्टका अनुसार कम्पनीको नयाँ इलेक्ट्रिक दुई पाङ्ग्रे सवारी साधन भिडा ब्रान्ड अन्तर्गत आउन सक्ने निश्चित छ । हिरो मोटोकर्प र हिरो इलेक्ट्रिकबीच भएको समझदारी अनुसार हिरो मोटोकर्पले ‘हिरो’ नाममा कुनै पनि इलेक्ट्रिक सवारीसाधन बिक्री गर्न नपाउने भएकाले यस्तो अनुमान गरिएको हो ।

हिरो मोटोकर्पले ताइवानको ब्राण्ड गोगोरोसँग ब्याट्री स्वाापिङ प्रविधिका लागि सम्झौता गरेको थियो । तसर्थ कम्पनीका भविष्यका ईभीहरुमा ब्याट्री हटाउन मिल्ने सवारी लन्च हुनेछ ।

कम्पनीका सीईओ पवन मुन्जालले हिरो मोटोकर्प इलेक्ट्रिक स्कुटरको झलक सार्वजनिक गरेका थिए, जुन ब्रान्डको पहिलो इलेक्ट्रिक स्कुटर हुन सक्छ । सो मोडलले भारतमा ओला एस१ प्रो, एथर ४५०एक्स, बजाज चेतक र टीभीएस आईक्यूबसँग प्रतिस्पर्धा गर्नेछ ।

कम्पनीले चाँडै नै इलेक्ट्रिक बाइक लन्च गर्ने अनुमान गरिएको छ । जसलाई कम्पनीको पहिलो इलेक्ट्रिक स्कुटर आएको केही महिना पछि लन्च गर्नेछ । यदि यसो भएमा इलेक्ट्रिक बाइक सेग्मेन्टमा रिभोल्ट आरबी४००सँग प्रतिस्पर्धा हुनेछ ।